Olimpiadaning bugungi kun dasturidan o‘rin olgan og‘ir atletikaning erkaklar o‘rtasidagi musobaqasida ijobiy natija kutgandik. Zero, bunga haqli edik. 22 yoshli Adham Ergashev 67 kg. vaznda qayd etib kelayotgan natijalari medallarni qo‘lga kiritishga yetarli edi.

Xususan, hamyurtimiz bundan 2 yil o‘smirlar o‘rtasidagi rekordlarni yangilashga sabab bo‘lgan natijalarni ko‘rsata olganida ham, bugun bronza medaliga sazovor bo‘lardi.

Uning omadsizligi dast ko‘tarish uslubidan boshlandi. U 139 kg. toshni ikkinchi urinishda ko‘targan bo‘lsa, 144 kiloni o‘ziga bo‘ysundira olmadi.

Siltab ko‘tarishda esa 173 kg.ni muvaffaqiyatli ko‘tarib, raqiblarining urinishlarini kuta boshladi. Vatandoshimiz bronza medalini qo‘lga kiritish uchun 184 kiloga buyurtma berdi. Ammo ikki urinishda ham u bu vaznni ko‘tara olmadi.

Vaholanki, 2019 yili Tailandda o‘tkazilgan o‘smirlar o‘rtasidagi jahon chempionatida Ergashev 146+182 = 328 kg. natija qayd etgandi. Bu safar esa bor-yo‘g‘i 139 + 173 = 312 kg. Oltinchi o‘rin.

Og‘ir atletika. Erkaklar, 69 kg.

1. Chen Li Jun (Xitoy) — 145 + 187 = 332 kg. (olimpiada rekordi)
2. Luis Xavyer Lozano (Kolumbiya) — 151 + 180 = 331 kg.
3. Mirko Zanni (Italiya) — 145 + 177 = 322 kg.
6. Adhamjon Ergashev (O‘zbekiston) — 139 + 173 = 312 kg.