Олимпиаданинг бугунги кун дастуридан ўрин олган оғир атлетиканинг эркаклар ўртасидаги мусобақасида ижобий натижа кутгандик. Зеро, бунга ҳақли эдик. 22 ёшли Адҳам Эргашев 67 кг. вазнда қайд этиб келаётган натижалари медалларни қўлга киритишга етарли эди.
Хусусан, ҳамюртимиз бундан 2 йил ўсмирлар ўртасидаги рекордларни янгилашга сабаб бўлган натижаларни кўрсата олганида ҳам, бугун бронза медалига сазовор бўларди.
Унинг омадсизлиги даст кўтариш услубидан бошланди. У 139 кг. тошни иккинчи уринишда кўтарган бўлса, 144 килони ўзига бўйсундира олмади.
Силтаб кўтаришда эса 173 кг.ни муваффақиятли кўтариб, рақибларининг уринишларини кута бошлади. Ватандошимиз бронза медалини қўлга киритиш учун 184 килога буюртма берди. Аммо икки уринишда ҳам у бу вазнни кўтара олмади.
Ваҳоланки, 2019 йили Таиландда ўтказилган ўсмирлар ўртасидаги жаҳон чемпионатида Эргашев 146+182 = 328 кг. натижа қайд этганди. Бу сафар эса бор-йўғи 139 + 173 = 312 кг. Олтинчи ўрин.
Оғир атлетика. Эркаклар, 69 кг.
1. Чен Ли Жун (Хитой) — 145 + 187 = 332 кг. (олимпиада рекорди)
2. Луис Хавьер Лозано (Колумбия) — 151 + 180 = 331 кг.
3. Мирко Занни (Италия) — 145 + 177 = 322 кг.
6. Адҳамжон Эргашев (Ўзбекистон) — 139 + 173 = 312 кг.
