Yaponiyadagi olimpiadada og‘ir atletika bo‘yicha 55 kg. vazndagi ayollar ikkinchi usul — siltab ko‘tarish bo‘yicha mashqlarni bajarishdi.

Dast ko‘tarish mashqidan so‘ng hamyurtimiz Muattar Nabiyeva 98 kg. bilan birinchi o‘rinni olgani haqida ma’lumot berib o‘tgandik.

O‘zbekistonlik atlet ikkinchi mashqni 114 kg. bilan boshladi va uni ko‘tardi. Ammo hakamlarning ikki nafari uning urinishini inobatga olmadi. Muattar ikkinchi urinishda toshni muvaffaqiyatli ko‘tardi.

Nabiyeva uchinchi urinishda 117 kiloga buyurtma berdi, ammo uni ko‘tara olmadi. Natijada vatandoshimizning ikki urinish bo‘yicha natijasi 212 kg.ni tashkil qildi.

Medallarga da’vogar bo‘lgan uch sportchi og‘irroq vaznlarda buyurtma berib, o‘zbekistonlik sportchining urinishlarini kutishdi.

Dast ko‘tarishda 90 kg bilan 7-o‘rinni olgan qozog‘istonlik Zulfiya Chinshanlo siltab ko‘tarishga 123 kg buyurtma berdi hamda uni ikkinchi urinishda zabt etdi. Oqibatda, qo‘shni mamlakat vakili 213 kg. natija bilan bronza medalini qo‘lga kiritdi.

Chempionlik uchun kurash Xitoy va Filippin vakillari o‘rtasida kechdi. Unda flippinlik Xidilin Dias raqibini bir kiloga ortda qoldirib, olimpiada chempionligini qo‘lga kiritdi.

Og‘ir atletika, ayollar, 55 kg.

1. Xidilin Dias (Filippin) — 97 + 127  = 224 kg.
2. Chiyun Liao (Xitoy) — 97 + 126 = 223 kg.
3. Zulfiya Chinshanlo (Qozog‘iston) — 90 + 123 = 213 kg.
4. Muattar Nabiyeva (O‘zbekiston) — 98 + 114 = 212 kg.
5. Kamila Konotop (Ukraina) — 94 + 112 = 206 kg.
6. Kristina Shermatova (Turkmaniston) — 90 + 115 = 205 kg.