Япониядаги олимпиадада оғир атлетика бўйича 55 кг. вазндаги аёллар иккинчи усул — силтаб кўтариш бўйича машқларни бажаришди.

Даст кўтариш машқидан сўнг ҳамюртимиз Муаттар Набиева 98 кг. билан биринчи ўринни олгани ҳақида маълумот бериб ўтгандик.

Ўзбекистонлик атлет иккинчи машқни 114 кг. билан бошлади ва уни кўтарди. Аммо ҳакамларнинг икки нафари унинг уринишини инобатга олмади. Муаттар иккинчи уринишда тошни муваффақиятли кўтарди.

Набиева учинчи уринишда 117 килога буюртма берди, аммо уни кўтара олмади. Натижада ватандошимизнинг икки уриниш бўйича натижаси 212 кг.ни ташкил қилди.

Медалларга даъвогар бўлган уч спортчи оғирроқ вазнларда буюртма бериб, ўзбекистонлик спортчининг уринишларини кутишди.

Даст кўтаришда 90 кг билан 7-ўринни олган қозоғистонлик Зулфия Чиншанло силтаб кўтаришга 123 кг буюртма берди ҳамда уни иккинчи уринишда забт этди. Оқибатда, қўшни мамлакат вакили 213 кг. натижа билан бронза медалини қўлга киритди.

Чемпионлик учун кураш Хитой ва Филиппин вакиллари ўртасида кечди. Унда флиппинлик Хидилин Диас рақибини бир килога ортда қолдириб, олимпиада чемпионлигини қўлга киритди.

Оғир атлетика, аёллар, 55 кг.

1. Хидилин Диас (Филиппин) — 97 + 127  = 224 кг.
2. Чиюн Лиао (Хитой) — 97 + 126 = 223 кг.
3. Зулфия Чиншанло (Қозоғистон) — 90 + 123 = 213 кг.
4. Муаттар Набиева (Ўзбекистон) — 98 + 114 = 212 кг.
5. Камила Конотоп (Украина) — 94 + 112 = 206 кг.
6. Кристина Шерматова (Туркманистон) — 90 + 115 = 205 кг.