Tokio-2020 olimpiadasining to‘qqizinchi kuni o‘zbekistonlik sportchilar uchun yakuniga yetdi. Sportchilarimizning bugungi natijalari bilan tanishtirib o‘tamiz.
Boks. +91 kg. Bahodir Jalolov hindistonlik Satish Kumarni 5:0 hisobida yengib, yarim finalga chiqdi. Bu esa medal naqd degani. Albatta, Bahodir oltin uchun asosiy da’vogar.
Yengil atletika. Uzunlikka sakrash. Darya Reznichenko ikki urinish natijasiga ko‘ra 13-o‘rinni egalladi.
Yunon-rum kurash. 60 kg. Elmurat Tasmuradov birinchi bellashuvini ukrainalik Lenur Temirovga 0:5 hisobida mag‘lub bo‘ldi.
130 kg. Mo‘minjon Abdullayev estoniyalik raqibi Artur Vititinni 8:0 hisobida yengdi. Lekin keyingi bahsni Abdullayev chililik Yasmani Fernandesga boy berdi.
Ikkala kurashchimizni yenggan raqiblar keyinchalik mag‘lub bo‘lishdi va bizni medallar uchun imkoniyatdan mahrum qilishdi.
Og‘ir atletika. 76 kg. Kumushxon Fayzullayeva dast ko‘tarishda 101 kg, siltab ko‘tarishda 126 kg og‘irlikni zabt etib, o‘z guruhida 6-o‘rinni egalladi va Olimpiadani medalsiz yakunladi.