Bugun Tokio olimpiadasida ayollar o‘rtasida zamonaviy beshkurashning ilk yo‘nalishi hisoblangan qilichbozlik sport turida bahslar o‘tkazildi. Unda 36 sportchi bir-biri bilan qisqa muddatli jang o‘tkazishdi.

Jang uchun bir daqiqa ajratiladi va unda birinchi bo‘lib shpagasini raqibga tekkazgan sportchi g‘olib chiqqan hisoblanadi. Ajratilgan vaqt davomida qilichbozlar ochkoni qo‘lga kiritmasa, har ikkisiga mag‘lubiyat yoziladi. G‘alaba uchun esa 6 ball beriladi.

Bugungi bahslarda ishtirok etgan  Alise Faxrutdinova 35ta bahsning 16tasida g‘alaba qozongan bo‘lsa, 19tasida mag‘lub bo‘ldi. Oqibatda u 196 ball jamg‘ardi hamda 22-o‘ringa joylashdi.

274 ochko jamg‘argan germaniyalik Annika Shleu yakka peshqadam bo‘lib oldi.

Endi sportchilar ertaga qolgan 4ta yo‘nalish — suzish (200 metrga erkin uslubda), ot yo‘rttirish (konkur), yugurish va o‘q otish mashqlarini bajarib, kerakli ochkolarini jamg‘arishadi. Kun eyakunida esa sovrindorlar nomi aniq bo‘ladi.