Kanadaning «Monreal» klubi MLS doirasidagi o‘yinda «Nyu-York Red Bullz»ni 2:1 hisobida yengdi.
Uchrashuvning asosiysi voqeligi - so‘nggi daqiqada ko‘rsatilgan penalti va uning ijrosi. AQSH klubi kiperi Karlos Koronel 90+3-daqiqada berilgan birinchi zarbani to‘sdi. Biroq VAR aralashuvidan so‘ng referi penalti qayta tepilishi kerakligiga ishora qildi - darvozabon to‘p tepilishidan oldin qadam tashlab, qoidani buzgan ekan. Qarangki, Koronel takroriy urinishdan keyin ham to‘pni qaytardi, vaholanki, u boshqa burchakka tepilgandi. Biroq referi yana darvozabonni qoidaga xilof tarzda ish tutganini qayd etdi, kamiga bu safar unga «sariq» ham berdi. Uchinchi zarbada esa Karlos qadam tashlagani yo‘q, lekin shunda ham, to‘p yo‘nalishini topdi. Faqat Viktor Vanyamaning uchinchi urinishi samarali chiqdi - to‘p darvozabon qo‘liga tegib, ichkariga kirdi...
Koronel penalti dramasidagina ko‘zga tashlangani yo‘q. U 16-daqiqada chinakam takrorlanmas «seyv» ko‘rsatgandi. Umuman, Nyu-York klubi 71-daqiqagacha hisobda oldinda bordi, lekin yakunda... Jamoa bosh murabbiyi Gerxard Shtruber penaltilar ketma-ketligidan jig‘ibiyron bo‘ldi, albatta: «Hakam o‘z ishini uncha yaxshi bajarolmadi, to‘g‘ri, bizda ham ayb bor - o‘yinni yaxshiroq nazorat qilishimiz kerak edi». «Nyu York Red Bullz» ayni payt Sharqiy konferensiya turnir jadvalida atigi 9-o‘rinni egallab turibdi.
Karlos Koronelga kelsak, 24 yoshli darvozabon 2017 yildan buyon huquqiy hihatdan «Zalsburg»ga tegishli. MLSga «sayohat» Koronel uchun Avstriya klubidan ikkinchi ijara safari hisoblanadi. U joriy mavsum okean ortida 18ta o‘yinda ishtirok etib, 24ta gol qo‘yib yubordi. Shunday kiperga ega «Nyu-York Red Bullz» qatorasiga 7ta o‘yindan buyon g‘alaba ko‘chasiga kirmayapti. Muxlislar esa Koronelni mashhur Yeji Dudekka o‘xshatishmoqda. Har holda, polshalik sobiq kiper ham penalti to‘sishda benazir edi.
