Канаданинг «Монреаль» клуби MLS доирасидаги ўйинда «Нью-Йорк Ред Буллз»ни 2:1 ҳисобида енгди.
Учрашувнинг асосийси воқелиги - сўнгги дақиқада кўрсатилган пенальти ва унинг ижроси. АҚШ клуби кипери Карлос Коронел 90+3-дақиқада берилган биринчи зарбани тўсди. Бироқ VAR аралашувидан сўнг рефери пенальти қайта тепилиши кераклигига ишора қилди - дарвозабон тўп тепилишидан олдин қадам ташлаб, қоидани бузган экан. Қарангки, Коронел такрорий уринишдан кейин ҳам тўпни қайтарди, ваҳоланки, у бошқа бурчакка тепилганди. Бироқ рефери яна дарвозабонни қоидага хилоф тарзда иш тутганини қайд этди, камига бу сафар унга «сариқ» ҳам берди. Учинчи зарбада эса Карлос қадам ташлагани йўқ, лекин шунда ҳам, тўп йўналишини топди. Фақат Виктор Ваньяманинг учинчи уриниши самарали чиқди - тўп дарвозабон қўлига тегиб, ичкарига кирди...
Коронел пенальти драмасидагина кўзга ташлангани йўқ. У 16-дақиқада чинакам такрорланмас «сейв» кўрсатганди. Умуман, Нью-Йорк клуби 71-дақиқагача ҳисобда олдинда борди, лекин якунда... Жамоа бош мураббийи Герхард Штрубер пенальтилар кетма-кетлигидан жиғибийрон бўлди, албатта: «Ҳакам ўз ишини унча яхши бажаролмади, тўғри, бизда ҳам айб бор - ўйинни яхшироқ назорат қилишимиз керак эди». «Нью Йорк Ред Буллз» айни пайт Шарқий конференция турнир жадвалида атиги 9-ўринни эгаллаб турибди.
Карлос Коронелга келсак, 24 ёшли дарвозабон 2017 йилдан буён ҳуқуқий ҳиҳатдан «Зальцбург»га тегишли. MLSга «саёҳат» Коронел учун Австрия клубидан иккинчи ижара сафари ҳисобланади. У жорий мавсум океан ортида 18та ўйинда иштирок этиб, 24та гол қўйиб юборди. Шундай киперга эга «Нью-Йорк Ред Буллз» қаторасига 7та ўйиндан буён ғалаба кўчасига кирмаяпти. Мухлислар эса Коронелни машҳур Ежи Дудекка ўхшатишмоқда. Ҳар ҳолда, польшалик собиқ кипер ҳам пенальти тўсишда беназир эди.
