O‘z vaqtida «Oq-tepa», «Obod», «Buxoro» va «So‘g‘diyona» kabi jamoalarni boshqargan Aleksandr Mochinov o‘zbek futbolida ko‘rinish bermay qo‘ydi. Uning bir muddat Rossiyada faoliyat ko‘rsatgani borasida ma’lumotlar paydo bo‘ldi. Keyinchalik Quvaytda ishini davom ettirgan mutaxassis yaqinda yurtimizga qaytib keldi. Fursatdan foydalanib, Mochinov bilan suhbatlashdik va o‘zimizni qiziqtirgan savollarga javob izladik.
- Aleksandr Vladimirovich, so‘nggi vaqtlarda o‘zbek futbolidan ancha uzoqlashdingiz. Bugungi kunda nimalar bilan bandsiz?
- Avvalo, suhbatga chaqirganingiz uchun tashakkur. Xabaringiz bor, 2018 yilda bir muddat «So‘g‘diyona» jamoasida faoliyat ko‘rsatdim. Iste’foga chiqqanimdan so‘ng Rossiyaga jo‘nab ketdim. U yerda «Krilya Sovetov» futbol akademiyasida yoshlar bilan ishladim. Samarada bir yil davomida mehnat qildim. 2019 yilda esa menga Quvaytdan taklif kelib tushdi. To‘g‘risi, «Kadisiya» jamoasi menejeri sifatida faoliyat olib borishim lozim edi. Darhol ushbu taklifga rozilik berganimdan so‘ng, u yerda menga yana bir lavozimni topshirishdi. Jamoaning ikkinchi tarkibini ham boshqardim. Asosiy vazifam yoshlar bilan to‘g‘ri ishlash va mamlakatning turli terma jamoalariga futbolchi yetkazib berish edi.
- Quvaytda bolalar futboliga juda katta e’tibor berilayotgani borasida ma’lumotlar bor. Bu haqiqatga nechog‘liq yaqin?
- Chindan ham Quvaytda bolalar futboliga e’tibor juda katta. Har bir klubning akademiyasi yoki futbol maktabida xorijlik murabbiylar ishlaydi. Quvayt kelajak uchun poydevorni hozirdan qurib bormoqda. Tajribali mutaxassislarni taklif qilishmoqda. Ularga yosh mahalliy murabbiy biriktirilgan va ular o‘z bilimlarini oshirishmoqda. Sharoitlar juda yaxshi. Klublar yoshlarga ko‘proq e’tibor qaratishni yo‘lga qo‘yishgan. Hozirda Quvayt milliy termasining natijalari yuqori darajada emas. Shu yo‘sin ishlashni davom ettirishsa, kelajakda bu albatta o‘z mevasini berishiga ishonchim komil.
- Eshitishimizcha, «Kadisiya» klubi bilan shartnomangiz yakunlangan. Boshqa jamoada ish boshlash arafasida turibsiz...
- Ha, albatta, «Kadisiya» bilan shartnomam muddati yakunlangan. Bu jamoa men uchun tramplin vazifasini o‘tadi. Quvaytning «Al-Nasr» klubidan taklif tushgan. Ularning ikkinchi jamoasi bosh murabbiyi sifatida ish boshlash arafasidaman. Tez orada Quvaytga qaytaman.
- Quvaytda ham murabbiylarga yuqori maosh to‘lashadimi?
- Bo‘lmasamchi! Har bir jamoada xorijdan kelganlar uchun yuqori maosh berishadi. Akademiya yoki futbol maktabi bo‘ladimi, farqi yo‘q. Murabbiy o‘z bilimlarini bolalarga bera olmoqda, ular buni juda qadrlashadi va yaxshilangan shartnomalarni taklif qilishadi.
- Ortda qolgan yillar davomida sizga o‘zbek klublaridan taklif tushdimi? Keyinchalik taklif bo‘lsa, uni qabul qilarmidingiz?
- To‘g‘risi, birorta klubimizdan taklif bo‘lmadi. Aks holda, buni o‘ylab ko‘rgan bo‘lardim. Superligada yana ishlash niyatim yo‘q emas. Hammasi tushadigan takliflarga bog‘liq.
- O‘zbekiston Superligasi o‘yinlarini kuzatyapsizmi?
- Albatta, Superliganing har bir o‘yini va unda qayd etilayotgan natijalardan boxabar bo‘lib boraman. Yurtimizda ishlagan vaqtlarimda qo‘l ostimda o‘ynagan ko‘plab shogirdlarimning ham ko‘rsatkichlari, harakatlarini kuzatmoqdaman. Superligada o‘yinlar ancha qizg‘in va kurashlarga boy tarzda o‘tmoqda. Raqobatbardosh jamoalar soni oshgani quvonarli.
- O‘z vaqtida bir nechta Superliga jamoalarini boshqargansiz. Ular orasida qaysi biri sizda iliq taassurot qoldirgan?
- So‘zsiz «Bunyodkor» jamoasiga bo‘lgan mehrim boshqacha. Ushbu jamoada ishlab, o‘zim uchun ko‘p jihatlarni o‘zlashtirganman. Umuman olganda, «Bunyodkor»ning ko‘rsatadigan o‘yinlari va natijalaridan muntazam xabardor bo‘lib turaman. Jamoa akademiyasida ko‘plab iqtidorli bolalarni kashf qilganmiz. Bugungi kunda ushbu yigitlar Superligada to‘p surishmoqda.
Izzat ABDULLAYEV suhbatlashdi
