Superliganing 17-turidan o‘rin olgan “Bunyodkor” — “Qo‘qon-1912” (2:1) uchrashuvidan keyin mezbonlar ustozi Shuhrat Maqsudov o‘z fikrlarini bildirdi.

- O‘yin shunday shiddatli o‘tishini kutgandik. Nafaqat bugun, balki barcha o‘yinlarimiz shunday ruhda o‘tmoqda. Bu kabi uchrashuvlar orqali yosh futbolchilar tajriba to‘playdi va kelajakda O‘zbekiston terma jamoasiga foyda keltirishadi, deb o‘ylayman. “Qo‘qon-1912” jamoasiga keyingi o‘yinlarda omad tilayman va Aleksandr Merzlyakovga tezroq tuzalib ketishini tilayman. Shuningdek, o‘zimizning futbolchimiz Farrux Ikromovga ham sog‘liq tilayman! Tez kunlarda jarohatidan qutilib, safimizga qaytishini tilab qolamiz! Har doim aytgan fikrlarimni qaytaraman, ko‘rsatlarimizni oxirigacha bajargan, g‘alabaga borini berib mehnat qilgan futbolchilarimga va klubimizning barcha xodimlariga katta rahmat aytaman! To‘g‘ri, o‘yinchilarda xatolar kuzatildi, ammo ishlagan va mehnat qilgan odam xato qiladi. Xato qildik va gol o‘tkazib yubordik. Lekin g‘alaba qozondik! Nurillo To‘xtasinovning o‘yinidan qoniqish hosil qildim, agar aksi bo‘lganida u zaxirada o‘tirgan bo‘lardi. O‘yin vaqtidagi e’tirozlarim shunchaki, vaziyatdan kelib chiqqan holda aytiladi.