Суперлиганинг 17-туридан ўрин олган “Бунёдкор” — “Қўқон-1912” (2:1) учрашувидан кейин мезбонлар устози Шуҳрат Мақсудов ўз фикрларини билдирди.

- Ўйин шундай шиддатли ўтишини кутгандик. Нафақат бугун, балки барча ўйинларимиз шундай руҳда ўтмоқда. Бу каби учрашувлар орқали ёш футболчилар тажриба тўплайди ва келажакда Ўзбекистон терма жамоасига фойда келтиришади, деб ўйлайман. “Қўқон-1912” жамоасига кейинги ўйинларда омад тилайман ва Александр Мерзляковга тезроқ тузалиб кетишини тилайман. Шунингдек, ўзимизнинг футболчимиз Фаррух Икромовга ҳам соғлиқ тилайман! Тез кунларда жароҳатидан қутилиб, сафимизга қайтишини тилаб қоламиз! Ҳар доим айтган фикрларимни қайтараман, кўрсатларимизни охиригача бажарган, ғалабага борини бериб меҳнат қилган футболчиларимга ва клубимизнинг барча ходимларига катта раҳмат айтаман! Тўғри, ўйинчиларда хатолар кузатилди, аммо ишлаган ва меҳнат қилган одам хато қилади. Хато қилдик ва гол ўтказиб юбордик. Лекин ғалаба қозондик! Нурилло Тўхтасиновнинг ўйинидан қониқиш ҳосил қилдим, агар акси бўлганида у захирада ўтирган бўларди. Ўйин вақтидаги эътирозларим шунчаки, вазиятдан келиб чиққан ҳолда айтилади.