Tennis bo‘yicha ulkan toj turkumiga kiruvchi «US Open» turnirida ayollar o‘rtasida yakkalik finali bo‘lib o‘tdi.

Jahon reytingida 150-o‘rinni egallab turgan 18 yoshli Emma Radukanu hal qiluvchi bahsda kanadalik Leyla Fernandes (№73)ni ikki setda mag‘lub etdi — 6:4, 6:3.

Shu taniqli britaniyalik sportchi Mariya Sharapovadan so‘ng («Uimbldon»-2004)  "Ulkan toj" chempionligini qo‘lga kiritgan eng yosh tennischiga aylandi.

Emma — "Ulkan toj" musobaqalari tarixida saralash bosqichidan asosiy to‘rga o‘tib, g‘olibga aylangan ilk sportchi bo‘ldi. Shu paytgacha na ayollar va na erkaklar musobaqasida hech bir sportchi saralashdan hattoki finalgacha yetib kela olmagan edi.

Radukanu "US Open"da jami 10ta o‘yinda ishtirok etib, raqiblariga birorta setni boy bermadi. U barcha o‘yinlarni 2ta setda hal qildi. U faqatgina bir marta bir bo‘limda raqibiga 5ta geymni boy berdi (saralashda).

Britaniyalik tennischi faoliyatida ikkinchi "Ulkan toj" musobaqasida ishtirok etib, mazkur sovrinni qo‘lga kiritdi. Shu paytgacha "Ulkan toj"ni eng tez qo‘lga kiritgan sportchilar sifatida Monika Selesh va Byanka Andreesku tilga olinardi. Ular 4ta urinishda nufuzli sovringa ega chiqishgan.

Radukanu WTA turkumiga kiruvchi bor-yo‘g‘i to‘rtinchi turnirda qatnashdi va faoliyatida ilk sovrin "Ulkan toj" bo‘lgan uchinchi sportchiga aylandi. Bungacha bu ishni ikki atlet qayd etgandi — Alena Ostapenko («Rolan Garros»-2017) va Iga Shventek («Rolan Garros»-2020).

Radukanu – "US Open" tarixida top-100ga kirmasdan g‘olibga aylangan ikkinchi tennischi.

Bugungi g‘alabadan so‘ng Emma Radukanu reytingda 150-pog‘onadan 23-o‘ringa ko‘tariladi. "US Open"dagi g‘oliblik uchun u 2040 ochko va 2.5 mln dollar mukofot pulini qo‘lga kiritdi.

US Open (Nyu-York, SSHA)
Mukofot jamg‘armasi – 57 500 000 dollar
Ayollar, yakkalik. Final

Emma Radukanu (Buyuk Britaniya) – Leyla Anne Fernandes (Kanada) — 6:4, 6:3