Futzal bo‘yicha O‘zbekiston milliy jamoasi a’zosi Davron Choriyev Jahon chempionatining 2-turi doirasida bo‘lib o‘tgan Rossiyaga qarshi o‘yindan o‘z fikrlari bilan o‘rtoqlashdi.

"Rossiyaga qarshi o‘yin og‘ir o‘tdi. Natija biz kutgandek bo‘lmadi, lekin bu natija ham keyingi bosqichga chiqish uchun imkon beradi. Ko‘p narsa Misrga qarshi kechadigan navbatdagi o‘yinga bog‘liq.

Rossiyaga qarshi bahs og‘ir kechishini kutgandik. Birinchi bo‘limda ko‘pinchi o‘yinimiz yaxshi chiqmayapti. Bu safar ham shunday bo‘ldi. Ikkinchi taymda esa o‘zimizni bosib olib, o‘z o‘yinimizni namoyish eta boshladik va hisobni tenglashtirdik. Bahs so‘ngida esa 2ta to‘p o‘tkazib yuborib, mag‘lubiyatga uchradik.

Endi bor e’tiborimizni uchinchi tur bahsiga qaratganmiz. Misr bizga qarshi o‘rtoqlik o‘yinida hamma narsasini ko‘rsatmagan bo‘lishi mumkin. Bu jamoa safida individual jihatdan kuchli o‘yinchilar bor. Murabbiylarimiz raqib o‘yinini o‘rganib chiqib, bizga to‘g‘ri maslahatlar berishadi. Misrni mag‘lub etamiz, degan umiddaman", — dedi Choriyev.