Pro liga 19-turining markaziy uchrashuvi doirasidagi «Nurafshon» — «Dinamo» (0:2) uchrashuvidan keyin buxoroliklar ustozi Usmon Toshevning o‘yin borasidagi fikrlari bilan qiziqdik.

— Usmon Qudratovich, jamoangiz bugun muhim bahsda mag‘lub bo‘ldi. O‘yin haqidagi fikrlaringiz?
— Meni hayron qoldirgani o‘yin davomida juda yomon harakat qildik. Bu meni o‘ylantirmoqda, har holda so‘nggi ikki kun davomida ham jamoa bilan yaxshi kayfiyatda yaxshi tayyorgarlik ko‘rgan edik.

Albatta, bugun mening ham qo‘pol xatoim bo‘ldi, tarkibda o‘zgarishlar qilishda ikkita xatoga yo‘l qo‘ydim. Bularning barchasi o‘yinimizga ta’sir qildi va o‘yinning borishini o‘zgartira olmadik. Dastlabki daqiqalardan o‘yin tizgini raqib tomonida bo‘ldi, «Dinamo» yaxshi o‘yin ko‘rsatdi. Ularni bugungi g‘alaba bilan tabriklayman. Endi jamoa bugun nega umuman harakat qilmagani haqida bosh qotiramiz.

— Marko Milichning birinchi bo‘limdayoq zaxiraga olingani nima bilan bog‘liq edi?
— U o‘yinda o‘zini yomon his qila boshladi. Shu bois uni almashtirishga qaror qildik. O‘yingacha esa unda hammasi joyida edi.

— Bu uchrashuvdan keyin 2-o‘rin bilan oradagi farq yanada kattalashdi. «Nurafshon»ning Superliga yo‘llanmasi uchun imkoniyatlarini endi qanday baholaysiz?
— Oldinda yana 5ta o‘yin bor, oxirigacha kurashishda davom etamiz. Keyingi ikkita o‘yindayoq g‘alaba qozonib, vaziyatni o‘zgartirish imkoniyati bor. Hamma narsa bo‘lishi mumkin. Shunday ekan, oxirigacha kurashishda davom etamiz.

Usmon Ibodov cuhbatlashdi.