Xabaringiz bor, shu kunlarda Saudiya Arabistonining Jidda shahrida og‘ir atletika bo‘yicha o‘smirlar o‘rtasida Jahon chempionati o‘tkazilmoqda.

Bugun o‘smirlar o‘rtasida -96 kg vazn toifasidagi sportchilar o‘z mahoratlarini namoyish etishdi.

Dast ko‘tarish mashqida hamyurtimiz Qurbonmurod Nomozov o‘z ishtirokini muvaffaqiyatli yakunladi. U dastlabki imkoniyatida 148 kg toshni ko‘tarishga muvaffaq bo‘ldi. Ikkinchi urinishida esa 153 kgni o‘ziga bo‘ysundirgan bo‘lsa, so‘nggi urinishda 163 kg toshni o‘ziga bo‘ysundira olmadi. Shunga qaramay, Qurbonmurod Nomozov raqiblarini ortda qoldirgan holda oltin medalga sazovor bo‘ldi.

Qurbonmurod Nomozov siltab ko‘tarish mashqida ham sayyoramizdagi tengsiz sportchi ekanligini isbotladi. Qurbonmurod Nomozovning siltab ko‘tarish mashqida 189 kg toshni o‘ziga buysundirib, bu yo‘nalishda ham oltin medal egasiga aylandi.

Hamyurtimiz ikki kurash natijasiga ko‘ra 342 kg natija ko‘rsatib, 1-o‘rinni qo‘lga kiritdi. Shunday qilib sportchimiz terma jamoamiz hisobiga 3 ta oltin medalni taqdim etdi.

O‘smirlar o‘rtasida jahon chempionati, erkaklar, 96 kg.

1. Qurbonmurod Nomozov (O‘zbekiston) — 153 + 189 = 342 kg.
2. Vekua Gurami (Gruziya) — 148 + 180 = 328 kg.
3. Muhammad Burun (Turkiya) — 147 + 179 = 326 kg.