“Metallurg” PFK bosh murabbiyligidan iste’fo bergan Jasur Abduraimov klub matbuot xizmati bilan bog‘lanib, dil so‘zlarini izhor etdi:

“Metallurg” jamoasida o‘tgan kunlarim men uchun katta tajriba maktabi bo‘ldi. Klub rahbariyati, futbolchilari, xodimlari bilan yetti oy davomida yelkama yelka, bahamjihatlikda mehnat qildik. Bekobodda o‘tgan kunlarim xotiramda bir umrga muhrlanib qolishiga shubham yo‘q. Jamoa bilan bir qator uchrashuvlarda g‘alaba nashidasi surdik. Kuchli raqiblar bilan tengma teng kurashdik, aksariyat jamoalardan ochko tortib oldik. Eng asosiysi muxlislarga yoqadigan – hujumkor, kombinasion futbol namoyish etishga harakat qildik.

“Metallurg” bilan barcha o‘ylagan rejalarimizni amalga oshira oldik, deya olmayman. Qayerdadir omadimiz chopmadi, qayerdadir jarohatlar, tarkibdagi yo‘qotishlar pand berdi. Yana qaysidir o‘yinlar uchun ishlab chiqqan taktikamiz samara bermadi. Ammo shuni ishonch bilan ayta olamanki, “Andijon”, “Qo‘qon 1912”, “Lokomotiv”, “Nasaf” singari jamoalarga qarshi o‘yinlarimiz muxlislarimizga manzur bo‘ldi.

So‘nggi paytlarda salomatligim bilan bog‘liq muammolar tufayli to‘liq kuch bilan ishlay olmadim. Buning uchun “Metallurg” PFK muxlislaridan uzr so‘rayman. Inson uchun salomatlik birinchi navbatda zarur. Shu sabab ham klub rahbariyatidan iste’fo berishlarini so‘radim. Fursatdan foydalanib, menga “Metallurg” PFK boshqaruvida faoliyat yuritishimda barcha zarur shart sharoitlarni yaratib bergan muassislarimiz – O‘zbekiston metallurgiya kombinati rahbariyatiga o‘z minnatdorchiligimni bildiraman. Klub rahbariyatiga, futbolchilariga mavsumning hal qiluvchi – so‘nggi to‘rtta tur uchrashuvlarida omad yor bo‘lishini tilab qolaman. “Metallurg” Superliganing o‘ziga xos o‘yin uslubiga ega, salohiyatli jamoalaridan biri. Ishonamanki, yigitlar qolgan o‘yinlarda o‘zlarining bor kuch va mahoratlarini ishga solishadi va jamoa kuchlilar safidagi mavqeini saqlab qoladi. Garchi klubdan ketgan bo‘lsam-da, men fikran sizlar bilan birgaman yigitlar! Bo‘sh kelmang, omad sizlarga yor bo‘lsin", - deydi Jasur Abduraimov.