Boks bo‘yicha Serbiyada davom etayotgan jahon chempionatida medal kutgan tajribali sportchilarimizdan yana biri — Shahram G‘iyosov musobaqani tark etdi. U qozog‘istonlik Aslanbek Shimbergenovga imkoniyatni boy berdi.

Qozoq bokschisi bo‘y va qo‘llarining uzunligi borasidagi ustunligidan unumli foydalandi. Hamyurtimiz himoyani mustahkam ushlagan holda raqib mudofaasini yorib o‘tishga intildi. G‘iyosov raunddan-raundga tashabbusni qo‘lga kiritib bordi. Ammo dastlabki bo‘limlarda yo‘qotilgan ochkolar yakunda mag‘lubiyatga sabab bo‘ldi.

Hakamlarning baholari — 0:5 (28:29, 28:29, 28:29, 27:30, 27:30).

Shu tariqa, Belgraddagi musobaqada O‘zbekiston va Qozog‘iston bokschilari o‘rtasidagi ikkinchi jang ham qo‘shnilarimiz foydasiga hal bo‘ldi. Delegasiyamizning to‘rtinchi vakili Mundialni tark etdi.