Бокс бўйича Сербияда давом этаётган жаҳон чемпионатида медаль кутган тажрибали спортчиларимиздан яна бири — Шаҳрам Ғиёсов мусобақани тарк этди. У қозоғистонлик Асланбек Шимбергеновга имкониятни бой берди.

Қозоқ боксчиси бўй ва қўлларининг узунлиги борасидаги устунлигидан унумли фойдаланди. Ҳамюртимиз ҳимояни мустаҳкам ушлаган ҳолда рақиб мудофаасини ёриб ўтишга интилди. Ғиёсов раунддан-раундга ташаббусни қўлга киритиб борди. Аммо дастлабки бўлимларда йўқотилган очколар якунда мағлубиятга сабаб бўлди.

Ҳакамларнинг баҳолари — 0:5 (28:29, 28:29, 28:29, 27:30, 27:30).

Шу тариқа, Белграддаги мусобақада Ўзбекистон ва Қозоғистон боксчилари ўртасидаги иккинчи жанг ҳам қўшниларимиз фойдасига ҳал бўлди. Делегациямизнинг тўртинчи вакили Мундиални тарк этди.