O‘zbekiston futbol assosiasiyasi tomonidan mamlakatimizda murabbiy, selesioner (skaut), tahlilchi, hakam, marketolog, psixolog va futbol menejeri kabi yuqori malakali futbol mutaxassislarini tayyorlash, qayta tayyorlash va malakasini oshirish borasida qator tizimli ishlar amalga oshirib kelinmoqda. Aynan ushbu yo‘nalishlarda markaz tashkil etilib, xorijiy va mahalliy tajribali mutaxassislar yordamida o‘zbek futbolining turli sohalarida faoliyat yuritadigan yetuk kadrlarni tayyorlash maqsad qilingan.

Bugun “Xalqaro skauting tashkiloti”ning taniqli mutaxassisi Kolin Chembers ishtirokida seminar bo‘lib o‘tdi. Tadbir avvalida O‘FA birinchi-vise prezidenti Ravshan Ermatov O‘zbekistonda mazkur sohani rivojlantirish masalasi bugunning asosiy vazifalaridan biri ekanligini, yosh kadrlarni yetishtirishda xalqaro tajribalardan foydalanish zarurligini ta’kidladi.

Shundan keyin angliyalik mutaxassis o‘zining uzoq yillik faoliyatidan kelib chiqib, skauting shunchaki jarayon emasligi, bu har qanday jamoaning keyingi natijalariga bevosita ta’sir o‘tkazadigan muhim harakat ekanligini aytdi. Shuningdek, yosh futbolchilarni tanlab olishda e’tiborga olish kerak bo‘lgan jihatlarga to‘xtaldi.

Seminar davomida maxsus videodarslik orqali futbolchilarni kuzatish, ularga baho berish va jismoniy holatini aniqlashda yordam beradigan nyuanslar haqida tushuntirishlar berildi. Kolin Chembers skautingda kichik detallar katta natijalarni keltirib chiqarishini qo‘shimcha qildi.

6 kunlik seminarning birinchi kunida, asosan, nazariy mashg‘ulotlar va videodarslikka urg‘u berildi. Keyingi kunlarda reja asosida amaliy mashg‘ulotlar o‘tkazilishi belgilangan.