Coca Cola Superliga 24-turidan o‘rin olgan “Navbahor” – “Metallurg” (1:0) uchrashuvidan keyin o‘tkazilgan matbuot anjumanida dastlab mehmonlar bosh murabbiyi Luisma Ernandez qatnashib, o‘yin haqidagi fikrlarini bildirdi.

— Namanganda o‘yin qiyin kechishini bilgandik. “Navbahor”ning muxlislari ko‘p, ular jamoalarini qo‘llab-quvvatlash orqali doimo raqib jamoaga bosim qilib turishadi. Shunga qaramay, bugun yaxshi o‘ynadik, juda ko‘plab vaziyatlar yaratdik, lekin oxirgi pallada imkoniyatlardan foydalanishda bizga omad yetishmayapti, — dedi Luisma Ernandez.

— Sizni akademiyadagi ishingiz orqali yaxshi bilamiz. “Metallurg”ni murakkab vaziyatda qabul qilib, qisqa muddatda yaxshi ishlarni amalga oshiribsiz, buni bugungi o‘yinda ko‘rdik. Jamoada qanday kamchiliklar bor va nimalarni o‘zgartirish kerak?
— Garchi O‘zbekistonga dastlab akademiyada ishlash uchun kelgan bo‘lsam ham, bundan avval Janubiy Koreya va Quvaytdagi professional jamoalarda bosh murabbiy bo‘lib ishlaganman. “Metallurg”ga kelsak, qisqa muddatda jamoani o‘yinga tayyorlashga to‘g‘ri keldi. Jamoada intensivlikni, shiddatni oshirish kerak. Kamchiliklarni to‘g‘rilagan holda, keyingi ikki turda ijobiy natija qayd etishga harakat qilamiz.

— Bugun shunday natija qayd etilishini kutganmidingiz? “Metallurg”ga joriy mavsum yuqori o‘rinlarni egallash uchun nima yetishmadi, deb o‘ylaysiz?
— Biz bu yerga g‘alaba qozonish uchun kelgandik, shu bois, natija biz uchun kutilmagan bo‘ldi. Maydonda ro‘y bergan voqealarni ko‘rdingiz, ularga alohida to‘xtalmoqchi emasman. Men “Metallurg”da ish boshlaganimda, jamoada nimadir o‘xshamayotgandi, qiyin vaziyatga tushib qolgandi. Shunga qaramay, murakkab chorlovni qabul qildim. Qisqa vaqt ichida astoydil mehnat qildik, ishlashda davom etamiz. Tushunaman, jamoamiz qiyin ahvolda, lekin futbol – jasur insonlar uchun, faqat qiyin chaqiruvlarni qabul qilganlargina futbolda muvaffaqiyat qozonadi.

— Shartnomangiz joriy mavsumga mo‘ljallanganmi yoki keyingi yil ham “Metallurg”dagi ishingizni davom ettirasizmi?
— Maqsadim – “Metallurg”ga yordam berish, qattiq mehnat qilish. Klubdagi kelajagim borasida mavsum tugagandan so‘ng rahbariyat bilan gaplashamiz.