Pro liga 22-turi doirasidagi «Dinamo» - «Nurafshon» (1:2) uchrashuvidan keyin Hakim Fuzaylov o‘yin borasidagi fikrlari bilan o‘rtoqlashdi.

«Bugungi o‘yinimizni futbol deb atay olmayman. Antifutbol edi, futbolchilar ko‘rsatmalarni bajara olishmadi. O‘yinni tahlil qilamiz. Shunday taassurotki, futbolchilar allaqachon ta’tilga chiqqandek o‘ynashdi. O‘yinimiz juda yomon chiqdi.

Ha, birinchi bo‘limda kichik ustunlik bizda edi, ammo o‘yinchilar xotirjamlikka berilgani sezildi. O‘zgarishlar qilingach, maydonga tushgan o‘yinchilar o‘z imkoniyatlaridan past to‘p surishdi.

Juda alamli mag‘lubiyatga uchradik. To‘g‘ri, vazifa uddalanib Superligaga chiqdik, ammo professionallardek oxirigacha kurashishimiz shart. Chempionat hali tugagani yo‘q. Yana oldinda ikkita tur bor, oxirigacha o‘ynash kerak. Biroq o‘yinda bugungidek shijoatsiz to‘p surish mumkin emas. Motivasiya yetishmasligi? Har qanday holatda ham maydonga tushgach, professionallardek oxirigacha kurashish va o‘yinga 100 foiz borini berish kerak. Bugun ishtiyoq ko‘rinmadi», - deydi «Dinamo» jamoasi bosh murabbiyi Hakim Fuzaylov.