Avval xabar berganimizdek, professional futbol klublariga ajratilayotgan mablag‘larning maqsadli sarflanishini monitoring qilish, klublarning infratuzilma va akademiyani rivojlantirish, shuningdek, maydonlarni xalqaro standartlarga moslashtirish va ularni sifatli saqlashga yo‘naltirishini ta’minlash maqsadida professional futbol klublarining yillik xarajatlar smetasi O‘FA bilan kelishilgan holda tasdiqlanishi belgilandi.

Yillik xarajatlar smetasi asosida moliyaviy mablag‘larni ajratilishida, xususan, stadion va maydon parvarishiga ustuvor maqsad bo‘ladi.

Bugun O‘FA birinchi vise-prezidenti Ravshan Ermatov maydoni namunali tashkil etilgan klublarning infratuzilma bo‘yicha vakillari va sohaning eng ilg‘or mutaxassislari ishtirokida yig‘ilish o‘tkazdi. Unda futbol klublarining maydonlarini yaxshilash, mashg‘ulot maydonchalarini tashkil etish, bu borada maydon mutaxassislarini tayyorlash, stadionlar holatini tahlil qilish borasida fikr almashildi.

Ravshan Ermatov maydonlar bevosita futbolning sifatiga ta’sir qilishi, ularni o‘yinlarga tayyorlash va chimlarni doimiy nazorat ostida ushlash kerakligini aytdi. Buning uchun zamonaviy texnologiyalarni jalb etish, chimlar vitaminizasiyasini yo‘lga qo‘yish, drenaj tizimini puxta tashkil etish ta’kidlandi. Mamlakatimiz iqlimini inobatga olgan holda maydonlarni tayyorlashga hozirdanoq kirishish va chimlarni bosqichma bosqich yaxshilash topshirig‘i berildi.

Yangi mavsumdan boshlab Superligada ishtirok etuvchi professional futbol klublari o‘z maydonlarini belgilangan standartlarga mos tayyorlashi zarur etib belgilab qo‘yilishi, talabga javob bermaydigan maydonlarda esa o‘yinlar o‘tkazilmasligi aytildi.

Bu borada maxsus ishchi guruh tashkil etilib, Respublikadagi barcha maydonlar holati o‘rganilishi belgilandi. Stadionlarni tahlil qilish orqali ularni sifatli holatga keltirishi bo‘yicha tizimli reja ishlab chiqish bo‘yicha ko‘rsatmalar berildi.