Аввал хабар берганимиздек, профессионал футбол клубларига ажратилаётган маблағларнинг мақсадли сарфланишини мониторинг қилиш, клубларнинг инфратузилма ва академияни ривожлантириш, шунингдек, майдонларни халқаро стандартларга мослаштириш ва уларни сифатли сақлашга йўналтиришини таъминлаш мақсадида профессионал футбол клубларининг йиллик харажатлар сметаси ЎФА билан келишилган ҳолда тасдиқланиши белгиланди.

Йиллик харажатлар сметаси асосида молиявий маблағларни ажратилишида, хусусан, стадион ва майдон парваришига устувор мақсад бўлади.

Бугун ЎФА биринчи вице-президенти Равшан Эрматов майдони намунали ташкил этилган клубларнинг инфратузилма бўйича вакиллари ва соҳанинг энг илғор мутахассислари иштирокида йиғилиш ўтказди. Унда футбол клубларининг майдонларини яхшилаш, машғулот майдончаларини ташкил этиш, бу борада майдон мутахассисларини тайёрлаш, стадионлар ҳолатини таҳлил қилиш борасида фикр алмашилди.

Равшан Эрматов майдонлар бевосита футболнинг сифатига таъсир қилиши, уларни ўйинларга тайёрлаш ва чимларни доимий назорат остида ушлаш кераклигини айтди. Бунинг учун замонавий технологияларни жалб этиш, чимлар витаминизациясини йўлга қўйиш, дренаж тизимини пухта ташкил этиш таъкидланди. Мамлакатимиз иқлимини инобатга олган ҳолда майдонларни тайёрлашга ҳозирданоқ киришиш ва чимларни босқичма босқич яхшилаш топшириғи берилди.

Янги мавсумдан бошлаб Суперлигада иштирок этувчи профессионал футбол клублари ўз майдонларини белгиланган стандартларга мос тайёрлаши зарур этиб белгилаб қўйилиши, талабга жавоб бермайдиган майдонларда эса ўйинлар ўтказилмаслиги айтилди.

Бу борада махсус ишчи гуруҳ ташкил этилиб, Республикадаги барча майдонлар ҳолати ўрганилиши белгиланди. Стадионларни таҳлил қилиш орқали уларни сифатли ҳолатга келтириши бўйича тизимли режа ишлаб чиқиш бўйича кўрсатмалар берилди.