Joriy yilning 19 aprel kuni O‘zbekiston U-18 chempionatiga qur’a tashlangan edi. Aprelda start olgan musobaqa noyabrga qadar davom etdi va so‘nggi turga kelibgina U-18 chempionatida zafar quchgan jamoa nomi aniq bo‘ldi.
16 noyabr sanasida O‘zbekiston U-18 chempionatida so‘nggi tur uchrashuvlari bo‘lib o‘tdi. 18 noyabrga belgilangan 17-turning qoldirilgan o‘yini “Qo‘qon-1912 U-18” – “Xorazm U-18” uchrashuvini inobatga olmaganda mavsumning qolgan barcha o‘yinlari o‘tkazib bo‘lindi.
So‘nggi turda AGMK U-18 mehmoni bo‘lgan “Neftchi U-18” 2:4 hisobida yakunlangan o‘yinda muhim g‘alabani tantana qildi va bu orqali farg‘onaliklar eng yaqin ta’qibchi “Paxtakor U-18”dan 2 ochkoga o‘zib ketgan holda 55 ochko bilan yakunda 1-o‘rinni qo‘lga kiritdi. “Sherlar”ga kumush medallar nasib etgan bo‘lsa, 3-pog‘onani 51 ochko bilan “Navbahor U-18” band etdi.
Bu yil Superliga va Pro liga klublarining U-18 jamoalari ilk bora umumiy O‘zbekiston U-18 chempionatida ishtirok etishdi. Jami 24 ta klub g‘oliblik uchun kurash olib bordi. Bunda har bir klub jami 23 tadan uchrashuvda maydonga tushishi hamda har bir raqib bilan chempionat yakuniga qadar faqatgina bir martadan to‘qnash kelishi ko‘zda tutilgan edi.
2020-yilgi mavsumda U-18 chempionati faqatgina Superliga klublari o‘rtasida tashkil etilgan bo‘lib, pandemiya sabab o‘yinlar soni 26 tadan 13 tagacha qisqartirilgan va markazlashgan formatda o‘tkazilgandi.
Aynan 2020 yilda Superliga va Pro liga tarbiyalanuvchilari o‘rtasida umumiy chempionat tashkil etish masalasi ko‘tarilgan bo‘lib, O‘zPFL 2021 yili ushbu tashabbusni amalga tatbiq qildi. Bu jihat Superliga hamda Pro liga o‘rtasidagi tafovutning yildan-yilga kamayib borishi, professional klublar qoshidagi akademiya bitiruvchilari o‘rtasidagi chempionat nufuzi va saviyasini yildan-yilga oshib borish maqsadida amalga oshirilmoqda. Kelasi 2022 yilda ham O‘zbekiston U-18 chempionati Superliga va Pro liga jamoalari ishtirokida umumiy tarzda tashkil qilinadi.
