Coca-Cola Superliga so‘nggi turlarida «Bunyodkor» ketma-ket g‘alabalarga erishib, turnir jadvalidagi mavqeini yaxshilab oldi. Mazkur uchrashuvlarda mezbonlar safida to‘p surgan qirg‘izistonlik Odil Abdurahmonov maydonda faol harakatlari bilan jamoasi g‘alabasiga hissa qo‘shdi. Shuningdek, u Qirg‘iziston termasi tarkibida Bahraynga qarshi kechgan bahsda gol muallifiga aylandi. Yaqinda ushbu futbolchi bilan suhbat uyushtirib, turli mavzular bo‘yicha savollarimizga javob oldik.
- «Bunyodkor» so‘nggi turlarda muhim g‘alabalarni qo‘lga kiritdi. Ushbu o‘yinlardan keyingi taassurotlar qanday?
- To‘g‘risi, mazkur uchrashuvlarda g‘alaba qozonmasak bo‘lmasdi. Mashg‘ulotlarda raqibga qarshi puxta tayyorgarlik ko‘rdik. O‘yin davomida bizda ham, raqib jamoalarda ham ko‘plab golli vaziyatlar bo‘ldi. Omad esa «Bunyodkor» tomonida bo‘ldi. Oxirgi daqiqalarda o‘zimiz uchun muhim bo‘lgan g‘alabani qo‘lga kiritdik va ochkolarimiz sonini ko‘paytirib oldik.
- Cuperligada mavsum tobora yakunlanib bormoqda. Ayting-chi, «Bunyodkor»da o‘tkazgan mavsumingiz sizda qanday taassurot qoldirdi?
- 2021 yilda O‘zbekistonda o‘tkazgan faoliyatimdan qoniqish hosil qildim, deb bemalol ayta olaman. Chunki mamlakatingizda to‘p surish orqali oldinga qadam tashladim. Tajriba oshirdim. «Bunyodkor»da futbolni tushunadigan va futbolchilarni qadrlaydigan insonlar yig‘ilgan. Ular orasida bo‘lganimdan xursandman. Biz mavsum avvalida oldimizga katta maqsadlar qo‘ygandik. Ba’zida kutilmagan natijalarimiz tufayli keragidan ortiq ochkolarni boy berdik. Shunga qaramay, kubokda munosib ishtirok etgan holda, xalqaro maydonga yo‘llanma olishimiz mumkin.
- Futbolga kirib kelishingiz qay tariqa ro‘y bergan? O‘zingiz haqingizda ko‘proq ma’lumot bersangiz.
- Futbolchilik faoliyatimni Qizilqiya shahrida boshlaganman. Shu shaharning futbol maktabida tahsil olganman. Keyinchalik «Abdish-Ata» klubi tizimiga o‘tdim. Professional futbolchi sifatida «Aldiyer» klubida to‘p surganman. U yerdagi o‘yinlarimni kuzatib borgan «Oloy» meni o‘z tarkibiga qo‘shib olgan. O‘sh shahri jamoasida besh mavsum faoliyatimni davom ettirdim. Shundan keyin «Bunyodkor»dan tushgan taklif asosida O‘zbekistonga keldim.
- «Bunyodkor»ga kelishingiz qanday sodir bo‘ldi?
- Bilishimcha, klub murabbiylar shtabi OFK kubogi va ichki chempionatdagi ishtirokimni kuzatib borgan. Shundan so‘ng meni jamoa o‘quv-yig‘in mashg‘ulotlariga taklif qilgan. O‘zbekistonga kelib, «qaldirg‘ochlar» ko‘rigida bo‘ldim va harakatlarim murabbiylarga ma’qul kelgan ko‘rinadi, menga shartnoma taklif qilishdi.
- O‘zbekiston Superligasi saviyasi borasida nimalarni ayta olasiz?
- Shunisi aniqki, O‘zbekiston Superligasi Osiyoda eng kuchli chempionatlardan biri hisoblanadi. Bu yerga kelib, amin bo‘ldimki, yurtingizda ham to‘p surish oson emas. O‘ziga yarasha qiyinchiliklari bor. Bu yerda o‘zim uchun katta tajriba to‘plamoqdaman.
- Endi «Bunyodkor» bilan tuzgan shartnomangiz xususida ma’lumot bersangiz...
- Hozircha bu haqda o‘ylab ko‘rganim yo‘q. Lekin «Bunyodkor» bilan 1}1 ko‘rinishida shartnoma imzolaganman. Mavsum yakuniga yetganidan so‘ng rahbariyat bilan kelajagim xususida gaplashaman. Balki keyingi yil ham faoliyatimni «Bunyodkor»da davom ettirarman.
- Sizningcha, Qirg‘iziston terma jamoasida qaysi futbolchi «Bunyodkor»da to‘p surib keta oladi, deb o‘ylaysiz?
- To‘g‘risi, bu savolingizga aniq javob berolmayman. Kimnidir muayyan ko‘rsatishim qiyin. Zero, «Bunyodkor»da o‘ynab ketish uchun futbolchining o‘ziga ko‘p narsa bog‘liq bo‘ladi.
IZZATBEK suhbatlashdi
