Yaqinda, futbol bo‘yicha O‘zbekiston XXX milliy Chempionatining Pro-Liga bahslari ham yakunlandi. “Sho‘rtan”ning undagi ishtirokini qanday baholash mumkin? Aslida, bu borada mutaxassislar gapirgani to‘g‘riroq bo‘lar edi. Ammo yil davomida ushbu jarayonlar ichida yurganligimiz va qaysidir ma’noda bevosita ishtirokchisi bo‘lganligimiz uchun biz ham qisqagina fikrlarimizni bayon qilishni ma’qul topdik.     

“Sho‘rtan PFK” MCHJ jamoasi 2021 yilda O‘zbekiston Respublikasi Prezidenti tomonidan mamlakatimizda futbolni rivojlantirish chora-tadbirlari to‘g‘risida qabul qilingan bir qator qarorlarini bajarish bo‘yicha ma’lum yutuqlarga erishdi.

Misol uchun, “Oq bo‘rilar” jamoasi qishki transfer oynasi davrida FIFA tomonidan legioner mutaxassislar borasida qo‘yilgan ta’qiq tufayli yangi mavsumga asosan mahalliy yosh futbolchilarga tayanib tayyorgarlik ko‘rdi. Dastlab, yangi mavsum arafasida an’anaviy “Qashqadaryo viloyati Hokimi Kubogi” turnirida g‘alaba qozonildi.

Lekin yosh jamoa yilni u qadar ham ko‘ngildagidek boshlay olmadi. Tarkib mukammal shaklanmaganligi avval boshida o‘z ta’sirini o‘tkazmay qolmadi. Dastlabki uchrashuvlar G‘uzor jamoasiga muvvafaqiyat keltirmadi. Shunday bo‘lsa-da, klub rahbariyatining sa’y-harakatlari bilan qarzdorlik masalasi asta-sekin o‘z yechimini topdi. O‘z o‘rnida tajribali mutaxassis Asror Aliqulov boshchiligidagi murabbiylar guruhining ham o‘rinishlari, astoydil harakatlari samara bera boshladi. Yil yakuniga kelib, PRO-Liga autsayderlari qatorida bo‘lgan “Sho‘rtan” turnir jadvalida o‘z qaddini ko‘tara oldi. Bir qator uchrashuvlarda g‘alabalar qozonildi. Shuningdek   

Coca-Cola O‘zbekiston Kubogi musobaqasida “Oq bo‘rilar” guruh o‘yinlarini munosib o‘tkazib, 1\8 final bosqichigacha yetib borishdi.

Yakunda, Asror Aliqulov boshchiligidagi G‘uzorliklar jamoasi PRO-Liga mavsumini yettinchi o‘rin bilan yakunlashdi.

Masalaning yana bir o‘ziga xos jihati shunda bo‘ldiki, faoliyati yaqindagini yo‘lga qo‘yilgan “Sho‘rtan” PFKning futbol Akademiyasi joriy yilda o‘z mevasini bera boshladi. Tajribali mutaxassis Ixtiyor Karimov murabbiyligida asosiy tarkib qoshida futbol musobaqalarida ishtirok etgan yoshlar (U-18) jamoasi ham O‘zbekiston Birinchiligi musobaqalarida munosib natijalarga erishdi.

Shu bilan bir qatorda, Osiyo futbol Konfederasiyasi va O‘zbekiston futbol Assosiasiyasi talablariga asosan barcha professional futbol klublari qoshida o‘g‘il bolalar qatori yosh, umidli qizlarning ham (U-16) futbol jamoalari ochildi. Dastlabki yilning o‘zidayoq mamlakat ayollar futbolida ko‘p yillar to‘p surgan, o‘z vaqtida mamlakat chempioni bo‘lgan tajribali murabbiy Zebo Jo‘rayeva hamda uning yordamchisi O‘g‘iloy Parmonovalarning murabbiyligida G‘uzorlik qizlar O‘zbekiston Chempionati (U-16) bahslarining finalida qatnashib, faxrli ikkinchi o‘rinni egallashdi.

Shuningdek, yuqoridagilarga qo‘shimcha qilgan holda “Sho‘rtan” PFK qoshida faoliyat olib borayotgan (U-14) va (U-16) yoshlar jamoalari ham viloyat ichidagi va Respublika miqyosidagi musobaqalarda muvaffaqiyatli ishtirok etib, anchagina yutuqlarga erishganligini qayd etish lozim.

“Sho‘rtan” PFK matbuot xizmati bo‘limi.