Bugun poytaxtimizda og‘ir atletika bo‘yicha kattalar o‘rtasidagi jahon chempionati boshlandi. Mamlakatimizda ilk bor o‘tkazilayotgan musobaqada 80 dan ortiq mamlakatdan 500 nafarga yaqin sportchi ishtirok etmoqda.

Musobaqani ayollar o‘rtasida -49 kg vazn toifasidagi “C” guruhi ishtirokchilari boshlab berdi. Shuningdek, bugun Toshkent vaqti bilan 16:00 da tantanali ochilish marosimi bo‘lib o‘tadi.

Ushbu dunyo birinchiligida 14 nafar vakilimiz yurtimiz sharafini himoya qiladi. Ular orasida Ruslan Nurudinov, Akbar Jo‘rayev, Adham Ergashev, Kumushxon Fayzullayeva, Doston Yoqubov kabi tajribali sportchilarimiz ham bor. E’tiboringizga vakillarimiz ishtiroki haqidagi ma’lumotni havola qilamiz:

Ayollar
-49 kg. Zuhra Otajonova - 19:00 (8.12)
-55 kg. Jamila Panfilova - 16:00 (9.12)
-71 kg. Kumushxon Fayzullayeva - 19:00 (13.12)
-87 kg: Tursunoy Jabborova - 19:00 (16.12)

Erkaklar
-67 kg. Adhamjon Ergashev va Doston Yoqubov - 16:00 (10.12)
-81 kg. Muhammadqodir Toshtemirov 19:00 (12.12)
-89 kg. Otaxon Imomov - 10:30 (13.12) (B guruh)
-89 kg. Sarvarbek Zafarjonov - 16:00 (13.12)
-96 kg. Hojiakbar Olimov - 08:30 (14.12) (C guruhi)
-96 kg. Qurbonmurod Namozov - 13:00 (15.12)
-109 kg. Ruslan Nurudinov va Akbar Jo‘rayev - 16:00 (16.12)
+109 kg: Mirhosil Mirzaboyev - 08:00 (17.12) (C guruh).

Og‘ir atletikachilarimiz uzoq yillardan beri o‘zlari ishtirok etadigan musobaqalarda muntazam yuqori o‘rinlarni egallab kelishgan. Umid qilamizki, o‘z muxlislarimiz ko‘z o‘ngida o‘tadigan bu galgi jahon chempionatida ham ulkan natijalarni qayd etishadi. Bu yo‘lda sportchilarimizga omad tilab qolamiz.
Bellashuvlar “Yunusobod sport majmuasi”da bo‘lib o‘tmoqda. Barcha muxlislarni hamyurtlarimizni qo‘llab-quvvatlashga chorlab qolamiz.