Ma’lum qilganimizdek, bugun poytaxtimizda og‘ir atletika bo‘yicha kattalar o‘rtasidagi jahon chempionati start oldi. Ayni daqiqalarda mazkur musobaqaning tantanali ochilish marosimi bo‘lib o‘tmoqda.
Marosimda O‘zbekiston Respublikasi Bosh vazirining o‘rinbosari, Turizm va sport vaziri Aziz Abduhakimov, MOQ rahbari Rustam Shoabdurahmonov, O‘zbekiston Respublikasi Qurilish vaziri, O‘zbekiston og‘ir atletika federasiyasi raisi Botir Zokirov, O‘zbekiston og‘ir atletika federasiyasi raisining birinchi o‘rinbosari, Osiyo og‘ir atletika federasiyasi vise-prezidenti Shahrullo Mahmudov, Xalqaro og‘ir atletika federasiyasi rahbarlari, ko‘p sonli muxlislar va musobaqada ishtirok etayotgan delegasiyalar qatnashishdi.
Marosim avvalida Prezidentimiz va hukumatimiz tomonidan sportga qaratilayotgan yuksak e’tibor haqidagi videorolik mehmonlarga taqdim qilindi. Shundan so‘ng sahnalashtirilgan turli badiiy chiqishlar yig‘ilganlar e’tiboriga havola etildi. Ayniqsa, O‘zbekistonda xizmat ko‘rsatgan artist Shukurullo Isroilov, O‘zbekiston va Qoraqalpog‘iston xalq artisti Jenisbek Piyazov, “Sitora” guruhi ishtirokidagi chiqish yig‘ilganlarga yuqori kayfiyat ulashdi.