Yevropa chempionlar ligasida bitta uchrashuvni hisobga olmaganda guruh bosqichi yakuniga yetdi. Ayni paytda pley-off bosqichiga chiqqan 15ta jamoaning nomi aniq bo‘ldi. O‘n oltinchi jamoa nomi "Atalanta" - "Vilyarreal" bahsidan keyin ma’lum bo‘ladi. Pley-off bosqichiga tashlanadigan qur’a haqida ma’lumot berib o‘tamiz.

Qachon?
Nimchorak final bosqichiga qur’a tashlash marosimi 13 dekabr kuni UYEFA qarorgohi joylashgan Shveysariyaning Nyon shahrida bo‘lib o‘tadi. Tadbir Toshkent vaqti bilan 16:00da boshlanadi.

Kimlar ishtirok etadi?
Guruh bosqichida dastlabki ikkita o‘rinni egallagan jamoalar pley-off bosqichida ishtirok etishadi. Guruh g‘oliblari birinchi savatcha, guruhda 2-o‘rinni band etganlar ikkinchi savatchadan o‘rin olishadi.

1-savatcha (guruh g‘oliblari)

"Ayaks" (Niderlandiya)
"Bavariya" (Germaniya)
"Liverpul" (Angliya)
"Lill" (Fransiya)
"Manchester Siti" (Angliya)
"Manchester Yunayted" (Angliya)
"Real" (Ispaniya)
"Yuventus" (Italiya)

2-savatcha (guruhda 2-o‘rinni egallaganlar)

"Atletiko" (Ispaniya)
"Benfika" (Portugaliya)
"Zalsburg" (Avstriya)
"Inter" (Italiya)
"Pari Sen-Jermen" (Fransiya)
"Sporting" (Portugaliya)
"Chelsi" (Angliya)
"Atalanta" (Italiya) / "Vilyarreal" (Ispaniya)

Qur’a tartibi
Bitta guruhda ishtirok etgan jamoalar hamda bir mamlakat vakillari nimchorak finalda o‘zaro to‘qnash kelishmaydi. Birinchi savatcha vakillari javob uchrashuvini o‘z maydonida o‘tkazishadi.

O‘yinlar qachon?
1/8 final bosqichining dastlabki uchrashuvlari 15/16/22/23 fevral kunlari, javob o‘yinlari esa 8/9/15/16 mart kunlari o‘tkaziladi. Chorak final bosqichiga qur’a tashlash marosimi 18 mart kuniga belgilangan.

Yangi qoidalar bormi?
UEFA joriy mavsumdan boshlab pley-off bosqichida "safardagi gol" qoidasini bekor qildi. Agar ikki o‘yin natijasiga ko‘ra hisob teng bo‘lsa, qo‘shimcha bo‘limlar belgilanadi. Unda ham g‘olib nomi aniqlanmasa, penaltilar seriyasiga navbat beriladi.