Ispaniya chempionatining 17-turidan o‘rin olgan «Osasuna» va «Barselona» jamoalari o‘rtasidagi uchrashuv hozirgina yakuniga yetdi.

Bahsning 12-daqiqasida kataloniyaliklar hisobni ochishdi. Gavining chiroyli uzatmasidan keyin Niko raqib jarima maydoni ichida to‘pni to‘xtatdi va darvozabon bilan yakkama-yakka vaziyatda to‘pni darvozaga joyladi.

Mezbonlar esa 2 daqiqa ichida hisobni tenglashtirib qo‘yishdi. Jarimadan yetkazilgan uzatmani David Garsiya bosh bilan darvoza tomon burib yubordi.

"Ko‘k-anorranglilar" birinchi bo‘lim oxirigacha tashabbusni o‘zlarida ushlab turgan bo‘lsalar-da, tanaffusga qadar hisob o‘zgarmadi. Ikkinchi bo‘lim boshida esa Xavi shogirdlari qarshi hujumdan unumli foydalanishdi. Dembele o‘ng qanotdan yetkazgan uzatma himoyachining bosh orqali Ez-Zalzuliyga kelib tushdi. Abdusamad esa yaqin masofadan darvozani zabt etdi.

Shundan so‘ng mezbonlar bosh murabbiyi bir nechta o‘zgarishlar orqali o‘yinni o‘zgartirishga harakat qildi va bu o‘z samarasini berdi. Bahs tugashiga 5 daqiqa qolganida Chimi Avila jarima maydoni tashqarisidan zarba yo‘lladi. To‘p esa Arauxoning oyog‘iga tegib o‘z yo‘nalishini o‘zgartirdi va to‘rga borib tushdi.

Qolgan daqiqalarda "Barsa" g‘alaba uchun harakat qildi, ammo bunga kuchi yetmadi. Shu tariqa, kataloniyaliklar yana ochko yo‘qotishdi va 24 ochko 8-pog‘onada qolishdi.

Ispaniya La ligasi, 17-tur
Osasuna – Barselona 2:2 (1:1)
Gollar: 0:1 – 12 Niko Gonsales, 1:1 – 14 David Garsiya, 1:2 – 49 Ezzalzuli.
Osasuna – Errera, Vidal (Xose Anxel, 74), Unai Garsiya, David Garsiya, Xuan Krus, Sanches (Roberto Torres, 73), Torro, Ruben Garsiya (Brashanas, 68), Monkayola, Barxa (Chimi Avila, 68), Kike Garsiya (Budimir, 68).
Barselona – ter Stegen, Pike, Umtiti, Arauxo, Buskets, de Yong, Niko Gonsales (Mingesa, 73), Ezzalzuli, Gavi, de Yong, Dembele (Koutinyo, 81).
Ogohlantirishlar: Vidal (28), Ruben Garsiya (37), Xuan Krus (49), Sanches (56), David Garsiya (67), Gavi (74), ter Stegen (83).