Kataloniyaning “Barselona” klubida to‘p surayotgan argentinalik hujumchi Serxio Aguero sog‘lig‘idagi muammolar tufayli futbolchilik faoliyatini yakunlaydi, deb xabar bermoqda “Marca” nashri. 33 yoshli argentinalik o‘z qarorini 15 dekabr, chorshanba kuni e’lon qiladi.
Futbolchining yuragi bilan bog‘liq muammolar bor. “Alaves”ga qarshi La Liganing 12-tur uchrashuvida argentinalik taxikardiya tufayli o‘zini yomon his qildi. Shundan beri birorta ham o‘yin o‘tkazmadi.
Eslatib o‘tamiz, Aguero “ko‘k-anorranglilar” safiga o‘tgan yozda kelib qo‘shilgandi. “Kamp Nou” egalari safiga o‘tishdan oldin forvard “Manchester Siti”, “Atletiko Madrid” va “Independiyente” klublarida o‘ynagan.
