Arsen Zaxaryan 17 yoshida «Dinamo» (Moskva)ning mavsum-2020|2021dagi eng yaxshi futbolchisi sifatida tan olindi. Afsuski, butun RPLning bosh kashfiyoti salomatligiga bog‘liq muammolar tufayli Yevro-2020da qatnashish baxtidan mosuvo bo‘lgandi. Zaxaryan ayni payt Rossiya chempionatida golga assistentlik bo‘yicha 2-o‘rinda ketmoqda va «Eng kuchli beshlik» sovriniga asosiy da’vogar sanalmoqda. Sport24 nashri muxbiri yaqinda Arsen bilan kelajak rejalari, «Dinamo»ning chempionlik uchun imkoniyati va bo‘lajak JCH saralashi doirasida muhim o‘yin haqida suhbatlashdi.
- «Dinamo» RPL ikkinchi davrasini «Zenit»ning asosiy ta’qibchisi sifatida boshlaydi. Mavsumning birinchi qismi qanday o‘tdi?
- Uzoq vaqt davomida birinchi marta bunchalik baland ko‘tarildik. Demakki, mavsumning dastlabki qismida munosib o‘ynadik. To‘g‘ri, kutilmagan yo‘qotishlarga ham uchradik, ayniqsa, nazariy jihatdan ochko olishimiz shart sanalgan o‘yinlarda.
- «Dinamo»ning birinchi davrada kuchli beshlikdan joy olishini taxmin qilish mumkin edi. Ammo chempionlik uchun kurashishi...
- Avvalgi mavsum bir-birimizga, shuningdek, murabbiy va yaratilgan muhitga ancha ko‘nikib oldik. Qolaversa, yozgi transferlar payti yaxshigina kuchaydik - tarkibga Balbuena, Laksalt va Makarov kabi yigitlar qo‘shilishdi. Aynan shu futbolchilar yordami yaqqol sezildi. Hozir jamoamiz yaxshi holatda va 2-o‘rin yomon emas, menimcha.
- «Dinamo» oltin medalni ko‘zlashga tayyormi?
- Aynan shunga intilamiz, sifatli futbol ko‘rsatyapmiz. Asosiysi, o‘yin davomida ustunlikka ega bo‘la turib, ochko yo‘qotmaslik. Ayniqsa, shu jihat ustida ko‘proq ishlashimiz kerak. Maqsad - maksimal natija. Albatta, 1-bo‘lish va Chempionlar Ligasida o‘ynashni istaymiz.
- «Zenit» birinchi davrada Moskvaning 4ta jamoasidan 3tasini mag‘lubiyatga uchratdi. Nima, Piter klubi Moskvada ham hukmronmi?
- Yo‘q, bunday emasligi o‘z-o‘zidan tushunarli. Ha, «Zenit» kuchli futbolchilarga ega, jamoaning har bir pozisiyada sifatli ijrochilar bor. Ammo piterliklarni yengish imkonsiz emas. Deylik, o‘zaro o‘yinda bosim o‘tkaza boshlaganimizda, raqibning ojiz tomonlari yaqqol ko‘rindi. Biroq shunchaki, vaziyatlardan samara chiqarolmadik va buning ortidan jazolandik. «Zenit»ning kuchi aynan vaziyatlar qadriga yetish masalasida bilindi.
- Aleksandr Kerjakov yaqinda «Dinamo»ni chempionlik uchun kurashda «Zenit»ning yagona raqibi sifatida tilga oldi.
- Birinchi davra endi tugadi, «Zenit» ham hali ochkolar yo‘qotadi, baribir. Shaxsan men «Lokomotiv» va «Sochi»ni hisobdan chiqarmagan bo‘lardim - har ikkisi Piter klubiga raqobat taqdim etishga qodir.
- «KraSava» nashriga bergan intervyungizda Yevropaning biror klubi siz bilan hali bog‘lanmaganini aytdingiz. Mana, oradan 3 oy o‘tdi, yangilik bormi?
- Yo‘q. Hozircha Yevropadan hech kim aloqaga chiqqani yo‘q. Shunchaki, gap-so‘zlar bor, hali aniq taklif tushmadi.
- O‘zingizga qolsa, Yevropaning kuchli 5ta ligasidan qay birini tanlardingiz?
- Ispaniya La Ligasini. Chunki texnik futbol tarafdoriman. Ispaniyada ayni shunday o‘yin hukmron.
- Ko‘pchilik sizni «Barsa»da qachon ko‘rish mumkinligiga qiziqmoqda...
- Xa-xa... To‘g‘risi, o‘zim ham bilmayman. Oldin taklif tushsin, keyin ko‘ramiz.
- Rossiya terma jamoasidagi debyutingiz «Lujniki»da xorvatlarga qarshi kechgan o‘yinga to‘g‘ri keldi. Hayajonlandingizmi?
- Oz-moz, muhimi, yigitlar dalda berishdi, murabbiy ham qo‘lladi. Qisqasi, ular qo‘ldan kelganicha harakatlanishimni so‘rashdi.
- Valeriy Karpin jamoada ishni sardorlik bog‘ichi egasini o‘zgartirish bilan boshladi. Milliy termaning haqiqiy yetakchisi kim?
- Barinov va Jikiya yaqqol ajralib turishadi. Aynan ularni asosiy yetakchilar sifatida ko‘rsatish mumkin. Umuman, kiyinish xonasida hamma o‘z so‘zini aytishi mumkin.
- Xorvatiya termasiga qarshi so‘nggi o‘yinni qayerda tomosha qildingiz? Kudryashovning avtogolidan keyin qanday ahvolga tushdingiz?
- Uyda, oila davrasida ko‘rdim, barchamiz xavotirda o‘tirdik. Otam futbol ko‘rayotganida, har doim asabiylashadi. Bunda mening maydonda bo‘lishim-bo‘lmasligimning farqi yo‘q.
- «Pley-off» bosqichining yarim finalida polyaklar to‘sig‘idan o‘ta olamizmi?
- Finaldan ham o‘tamiz, albatta.
- Demak, ishonch katta.
- Albatta. Nima, raqiblar tarkibida o‘zga sayyoraliklar o‘ynashadimi?
- Shoshmang, Polsha termasida bu yil «Oltin to‘p»ni qo‘lga kiritishiga sal qolgan Levandovski bor.
- Darvoqe, aynan Levandovski tarafdori edim, «Oltin to‘p»ni aynan unga berishlarini kutgandim. To‘g‘ri, Messi ham bunga loyiq.
- Xullas, o‘sha Levandovski Polsha terma jamoasida...
- Uni qanday to‘xtatishni murabbiy aytadi. Umuman, bizda ham ustun tomonlar yo‘q emas.
- Agar «Oltin to‘p» faqat RPL futbolchilariga berilganida, unga kim ega chiqardi?
- Kuchli uchlikni aytishim mumkin: Shimanski, Tyukavin va Jikiya. Menicha, yakunda «To‘p» birinchisi o‘ljasiga aylanardi.
- Golden Boy esa sizga nasib etardi...
- Yo‘q. O‘zim Tyukavinni tanlayman.
AYTGANCHA
Arsen Zaxaryan RPLning 2021 yilgi eng yaxshi yosh futbolchisi sifatida e’tirof etildi. «Dinamo»ning 17 yoshli yarim himoyachisi ekspertlar ishtirokidagi so‘rovda 445 ochko olib, «Ufa» hujumchisi Gamid Agalarov (312 ochko) va klubdoshi - hujumchi Konstantin Tyukavin (238 ochko)ni ortda qoldirdi. Zaxaryan 2021 yili RPLning 27ta o‘yinida 7ta gol urishdan tashqari, 11ta samarali uzatma muallifi bo‘ldi.
M.PO‘LATOV tayyorladi
