Amaliy jihatdan, har mavsum futbol olamiga navqiron, o‘ziga xos xususiyatlarga ega noyob iqtidorlarni tuhfa etadi. Yaqinda «Bayer» tarkibida yorqin o‘yinlarni namoyish etayotgan Florian Virs haqida hikoya qilgandik. Endi boshqa bir germaniyalik hujumchi - Karim Adeyemi «RB Zalsburg»dagi samarali faoliyati bilan muxlis va mutaxassislarni o‘ziga rom etmoqda.
Hozirning o‘zida 19 yoshli futbolchi top-klublar uchun transfer nishoniga aylandi. Istaymizmi-yo‘qmi, uni Erling Xolandga qiyoslamay o‘tolmaymiz. Norvegiya vakili aynan shu yoshda «Zalsburg»dan «Borussiya» Dortmundga o‘tgandi. Hozir Xoland dunyoning eng qimmat futbolchilaridan biri. To‘g‘ri, germaniyalik iqtidorning o‘z yo‘li bor, uning faoliyati endi boshlanmoqda...
Adeyemi 2002 yilning 18 yanvarida dunyoga keldi. Otasi nigeriyalik, onasi esa ruminiyalik. O‘zi Myunxenda tug‘ildi. Shu bois, Germaniya fuqarosi hisoblanadi. Yoshligidan futbolga oshno bo‘lgan bolakay 8 yoshida «Bavariya» tizimiga o‘tdi. Biroq u yerda atigi 2 yil bo‘ldi. Klub rahbariyati uning kelajagini aniq tasavvur qila olmay, undan voz kechishdi. 2011 yilda Karim «Forstenreyd»ga, yana bir yildan keyin «Unterxaxing»ga o‘tdi. Darvoqe, Myunxen yaqinidagi bu jamoani hozir Sandro Vagner boshqarmoqda. Aynan shu jamoada yosh hujumchi o‘z fazilatlarini namoyish eta boshladi. 2017/18 yillar mavsumida u 17 va 19 yoshlilar jamoalarida 22 marta maydonga tushib, 16ta gol va bitta assistni amalga oshirgandi. Ana shu sermahsul ishtirok Karimga «RB Zalsburg» eshiklarini ochdi.
2018 yilda Adeyemini 3,5 mln. yevro evaziga o‘z tarkibiga qo‘shib olgan «buqalar» uni o‘z farm-klublari «Lifering»ga ijaraga berishdi. Natijada hujumchi 2018/19 yillar mavsumida Avstriya chempionatining 2-divizionida 20ta uchrashuv o‘tkazdi va o‘z hisobiga 6ta gol bilan 2ta samarali uzatmani yozib qo‘ydi. Keyingi mavsumning 1-davrasidan keyin Karim «Zalsburg»ga qaytdi va 2020 yilning 3 iyunida asosiy jamoadagi debyutini nishonladi. O‘shanda hujumchi jamoaning «kovid» tanaffusidan keyingi dastlabki uchrashuvida «Rapid»ga qarshi 22 daqiqa to‘p surib, bitta assistni amalga oshirgandi.
«Buqalar» safidagi dastlabki golini esa Karim 1 iyul oqshomida «Shturm» darvozasiga urdi, goldan avval u 2ta samarali uzatmani amalga oshirishga ulgurgandi. Aynan o‘sha mavsumda hujumchi «Ayntraxt»ga qarshi 45 daqiqa to‘p surish bilan YELdagi ishtirokini ham boshlab oldi. Bundan tashqari, o‘smirlar o‘rtasidagi YECHL bahslarida «Zalsburg» yoshlariga «Lion», «Napoli» va «Derbi Kaunti»dagi tengdoshlarini mag‘lub etishda yordam berdi - deyarli barcha uchrashuvlarda Karim gol yoki assist muallifi bo‘lardi.
2020/21 yillar mavsumida Adeyemiga boshlang‘ich tarkibdan joy berishmadi, har bir uchrashuvda u o‘rtacha 37 daqiqa to‘p surdi. Biroq shunda ham chempionatda 29 marta maydonga tushib, 7tadan gol va assistga erishdi. Shuningdek, o‘sha mavsum Mos-kvaning «Lokomotiv» klubi darvozasini ishg‘ol etib, YECHLdagi gollariga hisobni ochdi. Hujumchining joriy mavsumdagi faoliyati yanada samaraliroq kechmoqda. Birinchidan, boshlang‘ich tarkibdan mustahkam o‘rin oldi. Ikkinchidan, ichki chempionatning 14 uchrashuvida 11ta gol urdi.
Ayni pallada Karim Avstriya chempionati to‘purarlari yetakchisi, har 88 daqiqada gol urmoqda. YECHLda esa 5ta o‘yinda 3ta golni amalga oshirdi. Avvaliga u saralash bosqichida «Brondbyu» darvozasini zabt etdi, keyin guruh bosqichida «Lill» va «Volfsburg» posbonlarini ranjitdi. «Dog»larga qarshi bahsdagi «dubli» g‘alabani ta’minladi. Hozirga qadar germaniyalik hujumchi «Zalsburg» safida 73 marta maydonga tushib, 25ta gol va 17ta assistni o‘z hisobiga yozdirib qo‘ydi.
2018 yilning fevralidan beri Adeyemi turli yosh toifalaridagi terma jamoalarda ishtirok etmoqda. Bundestimdagi debyut o‘yinini shu yilning 5 sentyabrida o‘tkazdi. O‘shanda jamoa JCH-2022 saralashi doirasida Armaniston termasi bilan kuch sinashgandi. Karim atigi 18 daqiqa o‘ynagan bo‘lsada, gol urishga erishdi. Shimoliy Makedoniyaga qarshi bellashuvda samarali uzatma muallifi bo‘ldi. Umuman olganda, hujumchi 48 daqiqa ichida terma jamoaga bitta gol va 2ta assist keltirdi.
Bundan tashqari, Karim urushdan keyingi davr mobaynida Germaniya terma jamoasi tarkibidan joy olgan Avstriya chempionatining dastlabki vakili bo‘ldi. 19ga chiqquniga qadar germaniyalik futbolchi Avstriya chempionligi va kubogining 2 karra sohibiga aylandi, yoshlar terma jamoasi bilan Yevropa chempioni unvonini qo‘lga kiritdi. Bundan tashqari, uni eng yaxshi yosh futbolchilar uchun ta’sis etilgan Fris Valter medali bilan ham taqdirlashdi.
Xullas, undagi shiddatli taraqqiyot, sermahsullik va natijalar «Liverpul», «Bavariya», «Arsenal», «Borussiya» Dortmund, «Barselona» va «PSJ»dek grandlarni qiziqtirib qoldi. Tez orada «Zalsburg»ga takliflar yog‘ilishiga shubha yo‘q. Mavjud ma’lumotlarga ko‘ra, boshqalardan ko‘ra «Dortmund» Karimni qo‘lga kiritishga yaqinroq turibdi. «Qovog‘arilar» unga uzoq yillik shartnoma va boshqqqa yosh futbolchilarga nisbatan ko‘proq maosh taklif qilishgan. Adeyemi uchun kurashda «PSJ» va «Bavariya» autsayderlar sifatida e’tirof etilmoqda. Parijda hujumchining o‘sishiga kafolat yo‘q, oldingi chiziqda saviyali hujumchilar yetarli. «Bavariya» taklifini esa hujumchining o‘zi rad etsa kerak - yoshlikdagi kuduratni unutish osonmas. Lekin nima bo‘lganda ham, Karimning «Zalsburg»da uzoq ushlanib qolmasligi aniq. Ehtimol, u yanvarda yangi chempionatni zabt etishga yo‘l olar. Ko‘ramiz.
MUHAMMADSODIQ tayyorladi
