Xabaringiz bor, 21-23 dekabr kunlari poytaxtimizdagi “Yunusobod sport majmuasi”da dzyudo bo‘yicha kattalar o‘rtasidagi O‘zbekiston chempionati bo‘lib o‘tadi.

Yilning so‘nggi musobaqasi oldidan Xalqaro dzyudo federasiyasi (IJF) referi direktori, Atlanta-1996 Olimpiya o‘yinlari sovrindori Armen Bagdasarov mamlakat chempionatida ishlovchi hakamlari uchun xalqaro seminar o‘tkazdi. Unda gruziyalik IJF referisi Vladimir Nutsubidze, IJFda faoliyat yuritayotgan yana bir hamyurtimiz Abdulla Murodov, Olimpiya toifasidagi o‘zbekistonlik xalqaro hakamlar Ramziddin Saidov, Vyacheslav Pereteyko, O‘zbekiston dzyudo federasiyasi Hakamlar hay’ati raisi Bahodir Uzakbergenov hamda chempionat bellashuvlarini boshqarish uchun taklif etilgan referilar ishtirok etishdi. Jarayonni MOQ raisi o‘rinbosari, O‘zbekiston dzyudo federasiyasi raisi Azizjon Kamilov ham kuzatib bordi.

Hakamlar bevosita dzyudochilarni musobaqa vaqtida his qilishlari uchun seminar davomida kimonoda bo‘lishdi. Armen Yuryevich boshqargan seminar IJF qoidalariga mos ravishda tashkil etildi. Katta monitorda musobaqalardagi bahsli vaziyatlar muhokama qilindi.

Tadbir yakunida Azizjon Kamilov ishtirokchilarga o‘z minnatdorchiligini bildirib, bo‘lajak musobaqani yuqori saviyada o‘tkazib olishlarini tilab qoldi.