"Manchester Yunayted" himoyachisi Fil Jons yanvar oyida "qizil iblislar"ni ijara asosida tark etishi mumkin. Angliyalik futbolchining xizmatlariga "Benfika" qiziqish bildirmoqda, deb xabar beradi "Daily Mail".

Ma’lumotlarga ko‘ra, "Benfika" Jonsni jamoaning himoya markazining mustahkamlovchi futbolchi sifatida ko‘rmoqda. Mankunianliklar bosh murabbiyi Ralf Rangnik himoyachini Portugaliyaga qo‘yib yuborishga tayyorligini ma’lum qildi.

Eslatib o‘tamiz, Jons 2011 yildan buyon "Manchester Yunayted"da o‘ynab kelmoqda. Futbolchining klub bilan shartnomasi 2023 yilning iyunigacha amal qiladi. Transfermarkt portaliga ko‘ra, futbolchining narxi 5 million yevroni tashkil qiladi.