Shvesiyalik sobiq futbolchi Zlatan Ibrahimovich o‘zining ijtimoiy tarmoqlardagi sahifasi orqalo og‘ir vazn toifasida sobiq jahon chempioni, britaniyalik bokschi Tayson Fyuriga qarshi jang o‘tkazishini rasman ma’lum qildi.

Faoliyati davomida “Milan”, “PSJ” va “Manchester Yunayted”da o‘ynagan 44 yoshli shvesiyalik hujumchi taekvondo bo‘yicha qora belbog‘ sohibi bo‘lib, jangovar sport turlarini juda yaxshi ko‘radi. U britaniyalik bokschi bilan birga tushgan suratlarini Instagram sahifasiga joylashtirib, jang qachon va qayerda bo‘lishini e’lon qildi.

“Tezkor xabar! Jang 1 avgust kuni Dublin (Irlandiya) shahrida bo‘lib o‘tadi”, deb yozdi shvesiyalik sobiq hujumchi.

Ibrahimovich buni rasmiy bayonot sifatida taqdim etgan bo‘lsa-da, ekspertlar va muxlislarning fikri ikkiga bo‘lingan. Auditoriyaning bir qismi buni shunchaki ko‘rgazmali shou yoki yirik piar deb hisoblasa, boshqalar Zlatanning jangovar sport turlaridan xabari borligi va professional ringda o‘zini sinab ko‘rish istagi borligi haqida yozmoqda. So‘nggi jangida rossiyalik Arslanbek Mahmudovni mag‘lub etgan Tayson Fyuri noyabr oyida Entoni Joshuaga qarshi o‘tkaziladigan yirik chempionlik jangi oldidan Ibrahimovich bilan o‘ziga xos shou-jang o‘tkazadi.