Bugun, 3 yanvar kuni “Manchester Yunayted” Angliya premyer-ligasi doirasida “Vulverxempton”ni qabul qiladi. Jamoa bosh murabbiyi Ralf Rangnik uchrashuv arafasida kadrlar bilan bog‘liq vaziyatga baho berib, taqvim tig‘izligi tufayli Krishtianu Ronalduni zaxira o‘rindig‘iga qo‘ymoqchi emasligiga shama qildi.
"Ronalduning sakkiz kun ichida uchta o‘yin o‘tkaza olmasligi uchun hech qanday sabab ko‘rmayapman. U jismonan tayyor, mashg‘ulotlarda barcha ko‘rsatmalarga amal qiladi. Bu eng yuqori darajadagi professional, uning o‘zi tayyorgarligini, ovqatlanishini, tanasini nazorat qiladi. Men hali bunday 36 yoshli futbolchini ko‘rmaganman. Balki Zlatan Ibragimovich hamdir, lekin uning futbol maydonida o‘rni boshqacha”, dedi Rangnik o‘yinoldi matbuot anjumanida.
