Bugun, 5 yanvar kunidan boshlab «Dinamo» jamoasi 2022 yilgi yangi mavsumga tayyorgarlikka kirishdi.

Jamoamiz Samarqand shahar Charxin qo‘rg‘onida joylashgan «Dinamo» PFK tasarrufidagi bolalar-o‘smirlar futbol maktabida klub homiysi «Agromir Buildings» tomonidan foydalanishga topshirilgan sun’iy qoplamali maydonda mashg‘ulotlar o‘tkazmoqda.

2021 yilgi mavsumdan keyin jamoa bilan shartnomasi yakuniga yetgan Jasur Hasanov, Obid Jo‘raboyev, Sardor Eminov, Ro‘zimboy Ahmedov, Islom Sharipov, G‘olib Sariboyev, Oleg Marchuk, Dmitro Sidorenko, Siroj Meliyev, Timur Hakimov, Timur Usmanov klub bilan xayrlashdi. «Dinamo» PFK ushbu o‘yinchilarga hamkorlik uchun minnatdorchilik bildirib, ularning keyingi faoliyatiga omad va zafarlar tilab qoladi.

Klub tez orada jamoada ish boshlaydigan murabbiylar shtabi va shartnoma imzolangach, yangi futbolchilar haqida ma’lumot beradi. Ilk yig‘inda asosan o‘tgan mavsumda jamoada bo‘lgan o‘yinchilar va mahalliy yosh futbolchilar ko‘rikdan o‘tkazilmoqda.