“Manchester Yunayted” yarimhimoyachisi Pol Pogbaning kelajagi noaniqligicha qolmoqda.

“Sky Sports” nashri xabariga ko‘ra, fransiyalik futbolchi hali “Yunayted” bilan yangi shartnoma imzolash yoki imzolash borasida bir qarorga kelmagan. Yarimhimoyachining amaldagi shartnomasi yozda yakuniga yetadi.

“Manchester Yunayted” o‘tgan yozda futbolchiga yangi shartnoma taklif qilgandi. Pogba buni na qabul qildi, na rad etdi. Futbolchiga klubdan yangi takliflar kelib tushmadi.

Pogba endi bor e’tiborini jarohatidan forig‘ bo‘lib, “Manchester Yunayted”ga qaytishga qaratgan. U noyabr oyida Fransiya terma jamoasi safida jarohat olgan va “Yunayted” safidagi 11 ta o‘yinni o‘tkazib yuborgan. 

Pol yanvar oyida boshqa klub bilan dastlabki shartnoma imzolash huquqiga ega, ammo katta ehtimol bilan futbolchi bundan foydalanmaydi va kelajagi borasida qaror qabul qilish uchun yozgacha kutadi.