Kecha Ispaniya chempionati 20-turidan o‘rin olgan "Real Madrid" – Valensiya" uchrashuvi bo‘lib o‘tdi (4:1). Quyida ushbu bahsga oid qiziqarli fakt va statistikalar bilan tanishib chiqishingiz mumkin.
– “Real” Anchelotti qo‘l ostida La Liga doirasida ketma-ket 27 ta uy o‘yinida yutqazmadi. Uy o‘yinlarida jamoa 423 daqiqa davomida o‘z darvozasi daxlsizligini saqlab turdi. Bu Anchelotti davridagi eng yaxshi natija;
– Karim Benzema “Real” safida 300 ta gol urgan tarixdagi to‘rtinchi futbolchiga aylandi. Undan avval Krishtianu Ronaldu (450 gol), Raul (323) va Alfredo Di Stefano (308) ushbu natijani qayd etgandi;
– Vinisius Junior La Liga joriy mavsumidagi gollari sonini 12 taga yetkazib oldi. Faqat Benzema (17) bu borada undan oldinda. Shuningdek, Vini “gol+pas” tizimida 20 talik dovondan o‘tdi;
– Benzema “Real” safida o‘zi ijro etgan barcha 15 ta penaltini golga aylantirdi. Karim buncha penaltini xatosiz amalga oshirgan klub tarixidagi ilk futbolchi bo‘ldi.
