Bugun poytaxtimizda 22 yoshgacha bo‘lgan o‘g‘il-qizlar o‘rtasida boks bo‘yicha qit’a chempionati boshlanadi. Unda Osiyo boksining bo‘lajak yulduzlari g‘oliblik uchun kuch sinashadilar.

Musobaqaga bo‘lgan ahamiyatning kattaligidan Xalqaro boks assosiasiyasi (IBA) prezidenti Umar Kremlyov, shuningdek Osiyo boks konfederasiyasi (ASBC) prezidenti Anas Alotaiba boshchiligidagi delegasiya Toshkentga yetib keldi. Shuningdek, kecha barcha ishtirokchi davlatlar vakillari ishtirokida texnik yig‘ilish bo‘lib o‘tdi. Unda turnir reglamenti, transport tizimi, COVID protokoli va boshqa yo‘nalishlarda kerakli ma’lumotlar berildi.

Rejaga ko‘ra, bugun "Hilton" mehmonxonasida chempionatga bag‘ishlangan matbuot anjumani bo‘lib o‘tadi. Tantanali ochilish marosimi esa 17:00 ga belgilangan. 18:00 dan dastlabki saralash bahslari o‘tkaziladi.

Qur’aga ko‘ra, birinchi kun dasturida terma jamoamizdan Javlonbek Yo‘ldoshev (-67 kg) birinchi bo‘lib ringga ko‘tariladi. Kechki dasturda andijonlik bokschimiz Saudiya Arabistoni vakili Rashid Saud Almarri bilan hisob-kitob qiladi.

Bo‘lajak musobaqada hamyurtlarimizga omad tilaymiz!