Braziliya terma jamoasi koordinatori Juninyo Paulista nima uchun "Real Madrid" futbolchilari Ispaniya kubogi chorak finalida o‘ynash uchun terma jamoadan ertaroq qaytishlariga ruxsat etilmasligini tushuntirdi.
“Futbolchilar FIFA tomonidan belgilangan muddat tugaguncha, ya’ni 2 fevralgacha biz bilan birga bo‘lishlari shart. Birinchi o‘yinda qanday o‘ynashimizga qarab, ular ikkinchi o‘yinda o‘ynash-o‘ynashmasligini muhokama qilishimiz mumkin, ammo biz ularning erta qaytishiga yo‘l qo‘ya olmaymiz. Biz futbolchilarimiz bilan o‘tkazishimiz mumkin bo‘lgan bir necha kundan unumli foydalanishimiz kerak", - dedi Paulista.
Shu tariqa, Eder Militao, Kazemiro, Vinisius va Rodrigolar katta ehtimol bilan Ispaniya kubogi chorak finalidan o‘rin olgan “Atletik” bilan bo‘ladigan bahsda o‘ynamaydi. O‘yin 3 fevral kuni bo‘lib o‘tadi.
