2022 yilning 29 yanvar kuni futbolga ixtisoslashgan ayrim nashrlar va ijtimoiy tarmoqlarda “Navbahor” bosh murabbiyi Samvel Babayan hamda futbolchi Sardor Rashidov o‘rtasida 300 ming dollarlik og‘zaki kelishuvga erishilgani haqida xabarlar tarqaldi. Shu munosabat bilan, “Navbahor” PFK Sardor Rashidovga taklif qilingani aytilayotgan summa bilan bog‘liq ma’lumotlar haqiqatga to‘g‘ri kelmasligini ma’lum qiladi.

Sir emaski, bugungi kunda “Navbahor” jamoasi to‘g‘risida sport nashrlarida juda ko‘plab xabarlar tarqalmoqda. Bunday pallada esa ma’lumotlarning haqqoniyligini aniqlash muhim ahamiyat kasb etadi. Shunday ekan, futbol jamoatchiligidan jamoamiz bilan bog‘liq axborotlar bo‘yicha xulosa chiqarish yoki ularni e’lon qilishdan avval “Navbahor” PFK rasmiy sayti va ijtimoiy tarmoqlarida e’lon qilingan, shuningdek, klubning rasmiy vakillari tomonidan tasdiqlangan ma’lumotlarga tayanib ish ko‘rishlarini samimiyat bilan so‘rab qolamiz.

Hozirda Namangan viloyati hokimi Shavkat Shokirjanovich Abdurazzaqovning bevosita qo‘llab-quvvatlashi asosida, “Navbahor” PFK rahbariyati va murabbiylar shtabi tomonidan yangi – 2022 yilgi mavsum uchun qo‘yilgan vazifalarni bajarish bo‘yicha keng ko‘lamli ishlar amalga oshirilmoqda. Seleksiya ishlari va transferlar masalasi shular jumlasidan, qolaversa, “Navbahor” infratuzilmasini tubdan shakllantirishga ham juda katta e’tibor berilmoqda. Albatta, qilinayotgan bu ishlardan ko‘zlangan asosiy maqsad – “Navbahor” brendini qayta jonlantirish, shuningdek, Namangan futbolining shonli davrini tiklashdan iboratdir.

Shunday ekan, “Navbahor” PFK futbol jamoatchiligidan jamoamiz bilan bog‘liq turli noto‘g‘ri ma’lumotlarga ishonmaslikni so‘rab qoladi.