2022 йилнинг 29 январь куни футболга ихтисослашган айрим нашрлар ва ижтимоий тармоқларда “Навбаҳор” бош мураббийи Самвел Бабаян ҳамда футболчи Сардор Рашидов ўртасида 300 минг долларлик оғзаки келишувга эришилгани ҳақида хабарлар тарқалди. Шу муносабат билан, “Навбаҳор” ПФК Сардор Рашидовга таклиф қилингани айтилаётган сумма билан боғлиқ маълумотлар ҳақиқатга тўғри келмаслигини маълум қилади.

Сир эмаски, бугунги кунда “Навбаҳор” жамоаси тўғрисида спорт нашрларида жуда кўплаб хабарлар тарқалмоқда. Бундай паллада эса маълумотларнинг ҳаққонийлигини аниқлаш муҳим аҳамият касб этади. Шундай экан, футбол жамоатчилигидан жамоамиз билан боғлиқ ахборотлар бўйича хулоса чиқариш ёки уларни эълон қилишдан аввал “Навбаҳор” ПФК расмий сайти ва ижтимоий тармоқларида эълон қилинган, шунингдек, клубнинг расмий вакиллари томонидан тасдиқланган маълумотларга таяниб иш кўришларини самимият билан сўраб қоламиз.

Ҳозирда Наманган вилояти ҳокими Шавкат Шокиржанович Абдураззақовнинг бевосита қўллаб-қувватлаши асосида, “Навбаҳор” ПФК раҳбарияти ва мураббийлар штаби томонидан янги – 2022 йилги мавсум учун қўйилган вазифаларни бажариш бўйича кенг кўламли ишлар амалга оширилмоқда. Селекция ишлари ва трансферлар масаласи шулар жумласидан, қолаверса, “Навбаҳор” инфратузилмасини тубдан шакллантиришга ҳам жуда катта эътибор берилмоқда. Албатта, қилинаётган бу ишлардан кўзланган асосий мақсад – “Навбаҳор” брендини қайта жонлантириш, шунингдек, Наманган футболининг шонли даврини тиклашдан иборатдир.

Шундай экан, “Навбаҳор” ПФК футбол жамоатчилигидан жамоамиз билан боғлиқ турли нотўғри маълумотларга ишонмасликни сўраб қолади.