Farg‘ona shahridagi “Samo” sport majmuasida futzal bo‘yicha mamlakat chempionatining 8-tur o‘yinlariga start berildi.
Tomoshabinlar tur va kunning birinchisidayoq qiziqarli uchrashuvga guvoh bo‘lishdi. “Bunyodkor” va “Nasaf” jamoalari o‘yinida darvozalar daxlsizligi saqlanib qolindi, vaholanki, har ikkala jamoa ham ko‘plab xavfli vaziyatlar sodir etishdi, gollar urishga nihoyatda yaqin kelishdi, biroq niyatlar amalga oshmay qolaverdi.
Ikkinchi uchrashuvda chempionat birinchi davrasi peshqadami “Lokomotiv” “Neftchi”ga hech qanday imkoniyat qoldirmadi, yirik hisobda ustunlik qildi. Uchinchi o‘yinga nafaqat kunning, balki turning, hatto chempionatning markaziy o‘yini sifatida qaralayotgandi.
Bungacha turnir jadvalida atigi bir ochko farqi bilan yonma-yon borayotgan “Huaxin-Jizzax” asosiy raqibi AGMKni mag‘lubiyatga uchrata olsa imkoniyatlarini yaxshilab olishi, natija aksincha bo‘lsa esa olmaliqliklar birinchi o‘ringa ko‘tarilib olishlari mumkin edi. Durang natija ham jizzaxliklar foydasiga ishlardi. Birinchi bo‘limda jizzaxliklar o‘z maqsadlariga yaqin kelishdi – bo‘limni o‘zlarining foydasiga tugatishdi. Ikkinchi bo‘limning ikkinchi qismida esa olmaliqliklar hisobni qisqartirib, raqiblari shashtini pasaytirishga urinishdi. Lekin bu urinishlar ikki daqiqaga yetdi xolos – Farhod Abdumavlonovning goli “Huaxin-Jizzax” futbolchilari joniga oro kirdi. Shu tariqa jizzaxliklar chempionlik sari yurishini dadil davom ettirishga zamin yaratishdi.
Futzal. Oliy liga. 8-tur.
Birinchi kun. 21 fevral, dushanba
Farg‘ona. “Samo” sport majmuasi.
BUNYODKOR – NASAF – 0:0. 34 tomoshabin.
Hakamlar: Sultonmurod Abdurahmonov, Rustam Tog‘ayev, Sanjar Rahmonov
Nazoratchi: Baxtiyor Namozov
Komissar: Jahongir Rahmatullayev
Ogohlantirishlar: Muhammadbobur Rahmonberdiyev (20) – Mamasharif Xalimov (20).
NEFTCHI – LOKOMOTIV – 2:6 (1:2). 52 tomoshabin.
Hakamlar: Shavkat Muhiddinov, Husan Muzaffarov, Mahmud Rustamov
Nazoratchi: Baxtiyor Namozov
Komissar: Jahongir Rahmatullayev
Gollar: Dilmurod Yusufjonov (7), Shuhratbek Rashidov (29) – Akbar Usmonov (4, 36), Jamoliddin Normirzayev (9), Dilmurod Shavkatov (25, 38), Ilyos Mallayev (34)
Ogohlantirishlar: Jahongir Maxsudov (35) – Ilyos Mallayev (7).
HUAXIN-JIZZAX – AGMK -2:1 (1:0). 116 tomoshabin
Hakamlar: Nikita Afinogenov, Umid Po‘latov, Murodxon A’zamjonov
Nazoratchi: Baxtiyor Namozov
Komissar: Jahongir Rahmatullayev
Gollar: Dilshod Rahmatov (14-pen.), Farhod Abdumavlonov (37) — Sunnatulla Jo‘rayev (35)
Ogohlantirish: Yo‘q – Muzaffar Ahadjonov (15).
