O‘zbekiston XXXI milliy chempionat bahslari boshlanishiga ham bir hafta vaqt qolmoqda. Yangi mavsumga qizg‘in hozirlik ko‘rayotgan Bekobodning “Metallurg” jamoasi tayyorgarlikning so‘nggi bosqichini o‘z uyida o‘tkazmoqda. Turkiya yig‘inidan keyin ma’lum muddat mashg‘ulotlar Bekobod shahridagi “Sementchi” o‘yingohida olib borilgandi. Ikki kundan buyon esa mashg‘ulotlar “Metallurg” stadioniga ko‘chdi.

Yangi mavsum arafasida futbolchilarning o‘yinga chanqoqligi yaqqol ko‘zga tashlanib turibdi. Murabbiylar shtabi har kuni ikki mahaldan tayyorgarlik ishlariga zo‘r berishgan. Kunning birinchi yarmida futbolchilarga jismoniy yuklamalar berilmoqda. O‘yinchilar guruhlarga ajratilib, trenajer zalida shug‘ullanishmoqda. Kunning ikkinchi yarmida esa ochiq maydonda, jamoa o‘yinini shakllantirish, to‘p bilan ko‘proq ishlash mashqlariga alohida e’tibor qaratilyapti.