Bugun “Navbahor” klubi bilan yaqin aloqalar o‘rnatish, yangi mavsumda o‘z oldiga yuksak maqsadlar qo‘ygan jamoa a’zolarini qo‘llab-quvvatlash, ularga 2022 yilgi Superliga bahslari starti oldidan motivasiya berish maqsadida, klub qarorgohiga O‘zbekiston – Rossiya SIBERIANWELLNESS xalqaro qo‘shma kompaniyasi vakillari tashrif buyurishdi.
Mazkur kompaniya vakillariga Namangan shahar, Davlatobod tumani hokimi Anvarjon Tojimirzayev, Davlatobod tumani prokurori Muhammadali Qirg‘izboyev, Davlatobod tumanidagi Prezident Xalq qabulxonasi boshlig‘i Sohibjon Homidov, shuningdek, “Navbahor” PFK rahbariyati, jumladan, klub prezidenti Otabek Samatov va klub sport direktori Akmal Sohibov hamrohlik qilishdi.
SIBERIANWELLNESS xalqaro kompaniyasi borasida to‘xtaladigan bo‘lsak, mazkur kompaniya kosmetologiya mahsulotlari hamda immunitetni oshiruvchi faol biologik qo‘shimchalar ishlab chiqarishga ixtisoslashgan bo‘lib, 27 ta mamlakatning 64 shahrida o‘z filiallariga ega.
Shu jumladan, AQSH, Yevropa hamda Osiyo davlatlarida ham mazkur kompaniya filiallari bor.
Viloyatimizda esa ushbu xalqaro kompaniya filiali Chust shahrida joylashgan bo‘lib, kompaniya bosh direktori Bahrom Xodjimatovning ta’kidlashicha, 3 yildan buyon sportchilarni immunitetlarini oshirish borasida faoliyat olib bormoqda. Shuningdek, hozirgi kunda Chust shahrida meva-sabzavotlarni qayta ishlab, ulardan immunitetni oshiruvchi sharbatlar, bundan tashqari, faol biologik qo‘shimchalar ishlab chiqariladigan katta zavod qurilmoqda.
Kelajakda mazkur zavodda ishlab chiqarilgan mahsulotlarni yurtimizga MDH mamlakatlari, shu jumladan, O‘rta Osiyo davlatlariga eksport qilish rejalashtirilgan.
SIBERIANWELLNESS xalqaro kompaniyasi vakillari va ularga hamrohlik qilgan mehmonlar jamoamiz uy uchrashuvlarini o‘tkazadigan “Markaziy” o‘yingoh maydonida “Navbahor” jamoasi murabbiylar shtabi va futbolchilari bilan uchrashishdi.
Uchrashuv davomida SIBERIANWELLNESS xalqaro kompaniyasi bosh direktori Bahrom Xodjimatov so‘zga chiqib, o‘z so‘zida "lochinlar" muxlisi ekanligi, 2016 yili Fransiyada bo‘lib o‘tgan Yevropa chempionati bahslarini yurtimiz bayrog‘ini baland ko‘targan holda, bevosita stadionlarda kuzatish baxtiga muyassar bo‘lganligi, o‘shanda O‘zbekiston klublari ham Yevropa darajasiga chiqishlarini orzu qilganligi, bu orzuni esa Xudo xohlasa, yangi mavsumda “Navbahor” amalga oshirishiga tilak bildirib, bo‘lajak mavsumda "Navbahor" o‘z oldiga qo‘ygan maqsadiga erishishida omad yor bo‘lishini tiladi.
Shundan so‘ng, “Navbahor” jamoasi vakillariga SIBERIANWELLNESS xalqaro kompaniyasining maxsus sovg‘alari topshirildi.
