O‘zbekiston Superligasining 1-turidan o‘rin olgan «Olimpik» — «Surxon» (0:0) uchrashuvidan so‘ng olimpiyachilar bosh murabbiyi Temur Kapadze fikr va mulohazalari bilan o‘rtoqlashdi.

— Hammani mavsum boshlangani bilan tabriklayman. Jamoalarga omad tilayman. Qiziqarli va kurashlarga boy o‘yin bo‘ldi. Birinchi tur bo‘lgani uchun qayerdadir hayajon sezildi. Vaziyatlardan foydalana olmadik. Superliganing havosi boshqa. ”Surxon“ kuchga tayanib o‘ynadi. Uzatmalar bilan o‘ynadi. Ikkinchi bo‘limda yaxshi harakat qildik. Xatolardan to‘g‘ri xulosa chiqaramiz.

— Jamoa mavsum oldidan legioner olmadi. Buni sizning shaxsiy qaroringizmi?
— Bizga legionerning keragi yo‘q. Maqsadimiz bunday o‘yinlar orqali tajriba olish. Osiyo chempionati turibdi, Olimpiada yo‘llanmasini qo‘lga kiritishimiz kerak. O‘zimizning yigitlar legionerlardan ham yaxshi harakat qiladi.

—Bir bosh baland raqiblar bilan o‘yinlarda futbolchilarga qanday motivasiya berasiz?
— Ruhiy holat muhim ahamiyat kasb etadi. «Surxon» ham nimalarga qodirligini bilmas edik. Hayajon to‘sqinlik qildi. O‘yindan o‘yinga kuchli bo‘lib boramiz. Yigitlar bosimdan o‘tib olishdi.

Jismoniy holatimiz optimal emasdir. Ikkinchi bo‘lim oxirida charchoq sezilgan bo‘lishi mumkin. Biz har tomonlama yaxshi edik. «Surxon» murabbiyi jismoniy tomondan munosib tayyorlaganligi ko‘rindi. Ispaniyalik murabbiy ko‘proq kombinasiya orqali o‘ynaydi, deb o‘ylagandik. Xatolar orqali o‘zimizga ishonch ortadi. Yigitlar bundan ham yaxshiroq o‘ynay oladi. Superligada oson jamoalar yo‘q. Ularga qarshi bahslarda foydali narsa olamiz.