Superliga 2-turidan o‘rin olgan "Paxtakor" - "Neftchi" o‘yinidan so‘ng (1:0) farg‘onaliklar bosh murabbiyi Ilhom Mo‘minjonov o‘z fikrlari bilan o‘rtoqlashdi.
"O‘yinga jiddiy tayyorgarlik ko‘rgandik. Futbolchilar bilan birgalikda "Paxtakor"ning so‘nggi ikki o‘yinini birga tomosha qilib, ularni o‘rganib chiqdik. O‘yinda asosan qarshi hujum orqali harakat qilmoqchi edik. Biroq 15 daqiqa bu rejada harakat qila oldik. Keyin futbolchimiz qizil kartochka bilan jazolandi va "Paxtakor"dek individual kuchli futbolchilari bor klubga imkonniyatni boy berdik. Raqibni g‘alaba bilan tabriklayman.
- Abror Ismoilov qizil kartochkada necha foiz aybdor edi?
- Birinchi bo‘limdan so‘ng vaziyatni ko‘rib chiqdik. Hakam to‘g‘ri qaror qabul qilgan.
Qizil kartochkadan keyin ham o‘yin uslubimizni o‘zgartirmadik. Futbolchilarimga maslahat berdim, biroq raqiblarning ikkala qanoti kuchli bo‘lgani sababli gol o‘tkazib yubordik. Buni o‘rganib chiqqan edik, biroq qizil kartochka bizning zararimizga o‘ynadi.
Yigitlar berilgan vazifani bajarishdi. Chetlatishdan so‘ng shunchaki "Paxtakor" bizga imkoniyat bermadi. Ular ham oddiy jamoa emas. Fuibolda gol urgan g‘alaba qozonadi. Keyingi o‘yinlarga tayyorgarlikni davom ettiramiz", - dedi Mo‘minjonov.
