Superliga 2-turidan o‘rin olgan "Paxtakor" - "Neftchi" o‘yinidan so‘ng (1:0) mezbonlar bosh murabbiyi Slavche Voyenski o‘z fikrlari bilan o‘rtoqlashdi.
"Kiyim almashtirish xonasida yigitlar bilan gaplashdim va ularga: "Bu o‘yindagi 3 ochkogina esda qoladi" dedim. "Neftchi" vakili Abror Ismoilovning qizil kartochkasidan afsusdaman.
Raqib bizga qarshi yaxshi o‘yin namoyish etdi. Ularni bu bilan tabriklayman. Bugun jamoam o‘zi xohlagan o‘yinni namoyish etolmadi. Shuning uchun, faqatgina 3 ochko bilan xursand bo‘lishimiz mumkin. Vaziyatlar ko‘p bo‘lgan bo‘lishi mumkin, ammo o‘yinimiz yaxshi emasdi.
Oliver Sharkichga jamoaga moslashib olishi uchun vaqt kerak deb o‘ylayman. U O‘zbekistonga dunyoning umuman boshqa burchagidan kelgan. Oddiy misol Aziz Turg‘unboyevning ham "Paxtakor" uslubiga moslashishi uchun 6 oy vaqt ketgan.
Imkoniyatlarini golga aylantirishda ancha no‘noqmiz. Bu borada ish olib boryapmiz. Tuzatishimiz kerak bo‘lgan asosiy kamchiligimiz so‘nggi pasni berish va diqqatni jamlash bo‘ladi.
O‘rinbosarlar jamoasi o‘yinlarini doim kuzatib boraman. Ular safida kattalar jamoasi bilan mashg‘ulot olib borayotgan bir qator futbolchilar bor.
Sherzod A’zamovni men emas, futbolchilar sardor qilib tayinlagan. Ular bir oila, doim birga yurishadi va kim bunga loyiqligini yaxshi bilishadi", - dedi "sherlar" bosh murabbiyi.
